【任主席壓力大】陳細潔笑指肥咗8磅 蔡李惠莉好緊張：點算呀

保良局主席陳細潔(Abbie)、玩具大王蔡志明太太蔡李惠莉等，今日喺銅鑼灣出席保良局董事會新春團拜。蔡太今年榮升主席，佢話已經開始有壓力，仲話已經同家人傾妥，蔡太話：「已經『哦』咗蔡生，一家人都會全力支持我，今年預咗全情投入為保良局。」

身旁嘅Abbie就話做主席好大壓力，上任頭兩個月都瞓唔着，問到會唔會瘦咗好多？Abbie笑言反而肥咗8磅，佢話：「一日可以跑好多場，好似啲好紅嘅明星咁，不過我反而肥咗8磅，因為成日食同坐。」一講到會變肥，蔡太即刻好緊張，佢笑話：「點算呀，我要諗吓先，o依家少食多餐。」而蔡太啱啱同阿仔加讚一家去澳洲旅行，同三個孫仔去咗10日，好開心，新一年蔡太祝願大家：「大家身體健康！一切順利。」