【元宵佳節】宋熙年計劃今年生B 最想收湯丸咁大粒鑽石

更新時間 (HKT): 2018.03.02 13:24

宋熙年、龔嘉欣、朱智賢、Rosemary噚晚喺灣仔會展現身珠寶晚宴活動,分別戴上華麗珠寶,宋熙年和朱智賢谷胸閃耀人前。

宋熙年擁有最寶貴嘅珠寶係老公陳智燊送贈嘅鑽石,自從婚後特別留意鑽石,認為可以投資及保值,每位女士都應該要擁有。今日元宵佳節,宋熙年隔空向老公要求禮物:「送粒鑽石俾我,要湯丸咁大粒。」即被大家取笑似劏老公多啲。兩公婆元宵相約朋友食飯,宋熙年話冇準備禮物,並自覺好慚愧,婚後只送過手錶俾老公。

如果上天賜予小朋友應該係二人最好禮物,宋熙年話:「好快送一個俾佢,努力當中,希望狗年有好消息通知大家。」另一方面亦被阿媽催生B,宋熙年話:「我阿媽直情流晒口水,仲打電話同我講澳洲有隻維他命對生BB好好,問使唔使寄俾我,我話好啦,明白佢意思,半年前已開始調理身體,希望狗年有好消息,但唔好俾太大壓力。」

龔嘉欣去年買咗粒一卡價值五位數字心形鑽石獎勵自己,希望每年買一粒用嚟保值,今年朝住六位數字目標買鑽飾。收男士鑽戒會唔會更開心?龔嘉欣話:「等求婚先,拍拖時都係自己買啦,我都等緊呢位求婚男士出現。」

龔嘉欣話現時有三位對象,就係沈卓盈、陳凱琳、譚凱琪,佢話:「元宵會一齊去陳凱琳屋企,全女班煮嘢食度過,佢哋三位元宵都撇甩另一半同我過,因為情人節冇陪我。」佢並透露今年會加油,現在有追求者了解中,係圈外人,有消息就會報喜。

娛聞樂陪你走遍全球追星,即Like「娛果」FB 專頁!
BannerBanner