【呼籲即睇醫生】噚日同細路出活動 馬浚偉中甲型流感 憂傳染

更新時間 (HKT): 2018.03.05 15:25

【新增回應】

馬浚偉噚日中午12點喺荃新天地出席護肺活動,擔任健肺活動大使,點知到咗噚晚11點幾,馬仔喺facebook貼咗張戴住口罩嘅相,留言話自己病倒入院:「Sorry!各位,我打敗仗入咗廠,呢幾日已安排的會議,要延後再開,實在抱歉抱歉!因我所引起的不便,敬請見諒!」佢仲話暫時要休息,所以WhatsApp同WeChat等暫時唔會回覆,請大家多多包容。

誰不知到咗今朝11點幾,馬仔再次喺fb留言,話自己中咗甲型流感。馬仔話:「昨天下午在家突然感到頭暈,跟住食粒藥、瞓個覺,起身時是晚上6點幾,點知全身發熱又發冷,二話不說請同事陪我去醫院……結果發燒38.5度,馬上檢查,中咗!我考咖啡師牌攞A(Distinction),流行性感冒都攞甲(甲型流感),最意想不到,我竟然有啲貧血……」

馬仔續道:「甲型流感發病好突然,來得又突然又快,特敏福果然有效,感謝醫生和護士們,今天已退燒,如無意外今天能出院,都係嗰句,祝大家身體健康!我自己都係!」馬仔笑言自己來又如風,離又如風,要閉關兩日好好休息。其實馬仔近日又忙於準備舞台劇、又寫劇本、又學做咖啡師同做其他進修,咁忙法,真係好易搞病自己。

馬仔之後又再更新留言:「其實我不在乎也不介意誰傳染我!我只怕我有沒有傳染別人!昨天中午我出席了個公開活動,有大人又有細路,如果你們覺得有唔舒服,就算少少唔舒服都快啲去睇醫生做流感檢測!希望大家都無事!祝大家平安健康!」

娛聞樂陪你走遍全球追星,即Like「娛果」FB 專頁!
BannerBanner