【林正英演過仲打殭屍!】話香港拍黃大仙冇人睇?網民反斥成龍忘本

更新時間 (HKT): 2018.03.07 19:15

已連續三屆連任全國政協委員嘅成龍,喺三月六日上午出席「全國政協十三屆一次會議文藝界別舉行小組討論開放日」,會後佢接受訪問,講及對電影市場嘅睇法,佢話o依只有一種電影,叫「中國電影」(新聞連結: http://bit.ly/2FkfPiI ),結果佢嘅一翻言論再次成功引起網民注意。

話說成龍喺會上講到:「你要拍黃大仙,你可能只能在香港播,你來到中國票房一定會不好,人家不了解,但你拍一些宏觀一點的,國際性的,好像《紅海》啊、《戰狼》啊,你就會去到國際。」

言論一出,真係八方響應,結果有網民將已故「殭屍先生」林正英喺1988年嘅作品《笑傲俠義黃大仙》搵出嚟,更留言:「成龍先生,同你出生入死過嘅兄弟林正英先生,就係用心拍你所講嘅《黃大仙》,佢嘅動作功夫片都可以走出香港,其實香港本地仲有好多好題材發揮,因為中國審查下電影冇乜題材發揮,就算黃大仙都係會被中國定性為『怪力亂神』唔過審(批),但再有人肯拍你唔支持就算,唔好誇大你依賴嘅中國市場。」喺貼文下亦有唔少網民支持。

《笑傲俠義黃大仙》嘅故事係講述黃大仙因為幫助凡人而被眨落人間,要行善渡劫先可以重返天庭,所以林正英喺電影中會行俠仗義、鋤強扶弱之餘得閒又會打下殭屍咁,充斥住八十年代嘅港式創意,故成龍之言一出,杜汶澤都話:「黃大仙?有得諗喎!」

另外亦有人感嘆係咪要香港電影以後只得《XX故事》、《XX行動》、《XX記》等而唔會再有《踏血尋梅》、《一念無明》、《陀地驅魔人》等香港題材先而夠「國際化」?

其實近十年香港電影當中的確多咗唔少合拍片,而呢類片嘅票房相較之下大多都係喺大陸市場較受歡迎,不過亦都有唔少合拍片,最終喺大陸市場或香港市場都未如理想,反之,以純香港題材製作嘅香港電影,特別係缺乏資金嘅小本電影亦唔見得冇市場,部份如《一念無明》等除咗有口碑之餘更有獎拎,當年香港電影衝出國際亦唔見得係用「國際性」突圍,就正如你將岩石磨為沙再拋到沙灘上亦驚不起駭浪來一樣,香港電影唯有如貝殼一樣,堅持本質先可以發光發亮。

娛聞樂陪你走遍全球追星,即Like「娛果」FB 專頁!
BannerBanner