【撐習總稱帝】林建岳從政難兼顧娛樂事業 余文樂楊千嬅執包袱

更新時間 (HKT): 2018.03.15 19:00

全國政協委員、經民聯監事會主席林建岳商界長袖善舞,政界亦動作多多,最近佢喺全國政協十三屆一次會議中,獲選為政協常委。

習總修憲稱帝,身在北京嘅林建岳即表態支持修憲,仲話更換領導人後會將舊有政策推翻,長遠會令社會「動盪不安」。陶傑形容林建岳係「香港權威性公開表態之第一人」,行得仲快過建制派。

岳少喺政治上嘅表態,亦見之於寰亞電影有份俾錢拍嘅《建軍大業》——被形容為中共解放軍建軍90周年獻禮影片。首映禮仲請得郁三任特首,以及國務院港澳辦主任張曉明、同解放軍駐港部隊政委岳世鑫等到場。但《建》片映期撞正《戰狼2》,喺大陸票房成強烈對比,仲有香港網民發現,《建》片喺部分戲院近乎爆滿,第一行都全部售罄……

有得,就有失。林建岳專心從政,娛樂事業方面,難免顧此失彼,首當其衝受影響嘅,當然係寰亞娛樂,重災區係電影部。

寰亞娛樂電影部張成績表,最近一直欠理想,負責主理電影部嘅陳嘉上同陳慶嘉又百足咁多爪,亦要兼顧唔同製作,以致發展一直失衡。

同林建岳合作十一年嘅楊千嬅,以及「志明」余文樂最近分別約滿寰亞,齊齊走人。千嬅就撐老公丁子高組公司,做埋佢經理人;余文樂就搵番舒淇經理人管東銚繼續幫佢。念舊嘅千嬅言明,以後工作上寰亞仍是首選,而寰亞執董陳志光都話,千嬅已同公司溝通清楚,未來在音樂及電影上都會有緊密合作。

至於有合約嘅導演好似劉偉強(《建軍大業》導演)、杜琪峯等,合約到期之後,都會回復自由身接戲。

據知情者稱,公司內部士氣低落,而且業績未如理想,上周已裁咗十幾人,人心惶惶。事有湊巧,劉德華年底跨年演唱會,都冇預寰亞娛樂一份。暫時似乎前路仍未明朗。

娛聞樂陪你走遍全球追星,即Like「娛果」FB 專頁!
BannerBanner