【夫妻檔拍住上】約滿東亞唔續約? 楊千嬅與丁子高自組經理人公司

更新時間 (HKT): 2018.03.15 14:32
(資料圖片)

【新增回應】

楊千嬅喺2006年加盟林建岳旗下嘅東亞娛樂,全力向唱歌同電影方向發展,舊年千嬅憑電影《春嬌與志明》首奪金像影后,大家一直合作得好開心。

不過今日有周刊報道,千嬅決定唔續約,將會同老公丁子高自立門戶,自組經理人公司,千嬅之後嘅所有工作都由老公幫手接洽,實行肥水不流別人田。報道仲話千嬅同老闆一直合作得好開心,但係向來好緊張事業嘅千嬅,覺得好似欠缺咗啲火花,覺得係時候有一個新開始,之不過日後工作都會以寰亞為首選,大家仍然會繼續合作。

報道又話近年丁子高公關公司嘅生意上咗軌道,基本上兼顧埋老婆嘅嘢係完全冇問題,而且因為係自己話事,可以多咗時間照顧Torres。事實上日前千嬅出席無綫劇《多功能老婆》嘅記者會,已透露係余詠珊搵丁子高接洽,似乎已經有跡可尋。

今日《蘋果》向寰亞傳媒集團執行董事陳志光求證,佢話:「楊千嬅跟寰亞合作多年已建立默契,已跟公司與老闆溝通清楚,未來在音樂及電影上都會有緊密合作。」

娛聞樂陪你走遍全球追星,即Like「娛果」FB 專頁!
BannerBanner