【C1頭條】突襲舊愛尷尬收場 方力申要求握手 Stephy嚇儍

更新時間 (HKT): 2018.03.18 23:59

方力申(小方)、鄧麗欣(Stephy)分手近兩年,今日與任賢齊(小齊)、陳瀅、歐鎧淳同胡子彤喺香港仔為「第六屆揹水一戰」擔任起步禮嘉賓,並身體力行揹住4.5公升水挑戰15公里。

開步禮中,小方喺台上突然主動同Stephy握手,Stephy被佢嚇一嚇,諗咗1秒先伸手出嚟,及後二人大方合照,此時,司儀伍家謙欲叫小齊上台,不過小方示意小齊多等一陣,似乎好讓佢同Stephy合照多幾張。

Stephy事後話:「頭先驚一驚,我本身已經唔夠瞓,一擰轉頭就被咁大隻嘅人嚇一嚇,同埋本身rundown佢係未上台。」對於大會安排小方同Stephy分開訪問,小方話:「分開訪問好正常,0依家又唔係同公司,我都想一齊做訪問,我冇所謂。」合照?佢表示:「好,上年都有合照架!」

提到Stephy憑《空手道》奪得香港電影評論學會影后,以及《蘋果動新聞》首辦第一屆「最港電影大獎」嘅「最港女演員」,小方笑住話:「最港女丫嘛,當之無愧。」Stephy聞後笑謂:「佢證實咗我係港女,其實我喺電影上做咗好多次港女,就算《空手道》都係港女角色,我覺得可以為港女爭光都係開心,港女嘅感覺俾大家係負面,我覺得唔係,0依家港女係好獨立,好叻女。」

講到有傳無綫有意再開拍《美女廚房》,有網民想小方、鄭中基同梁漢文可以繼續做主持,小方話:「網民實有唔同嘅反應,我都想做,以前我好悶,但做咗《美女廚房》之後,我冇咁拘謹,不過無綫冇搵我,已經係10年前嘅事,都唔同年代,可能佢哋有更啱嘅人選。」

娛聞樂陪你走遍全球追星,即Like「娛果」FB 專頁!
BannerBanner