【《春嬌救志明》】奪大阪亞洲電影節觀眾獎 楊千嬅:我都戥導演開心

更新時間 (HKT): 2018.03.18 20:12

【新增內容】

第13屆大阪亞洲電影節今日閉幕,繼昨日舉行頒獎典禮後,今日大會壓軸公佈盛會上嘅觀眾獎殊榮,由彭浩翔執導電影《春嬌救志明》脫穎而出。

由楊千嬅夥拍余文樂嘅《春嬌救志明》,雖然並非今屆大阪亞洲電影節嘅主競賽作品,但就以「Special Focus on Hong Kong 2018」組別參展,卻贏得當地觀眾選為最佳作品。

彭浩翔回應《蘋果》:「感謝大阪亞洲電影節嘅觀眾,將呢個觀眾投票獎俾咗《春嬌救志明》,今年因為正喺度忙緊新片嘅劇本,所以冇機會同大阪電影節嘅觀眾見面,但係都好多謝大家嘅熱情同埋支持。」

而今晚楊千嬅出席香港電影導演會周年晚宴嘅時候,對於《春嬌救志明》喺大阪電影節得獎,千嬅話:「有份參演嘅電影得獎係件開心事,對於春嬌同志明嚟講呢個都係非常好嘅結局,我都戥導演開心。」

問到楊千嬅係咪會離開公司?千嬅大方承認:「我基本上同公司喺12月嘅時候已經完咗約,証明我同老闆嘅關係有幾好,大家仲咁用心同我做呢個演唱會,不過其實我都仲同公司有合作,只係轉咗方式,由full time轉做freelance,的確我老公係開公司簽返我,不過其實張結婚証書已經係合約啦,主要都係因為時間問題,自己o依家有家庭,嚟緊唱片發行會係環亞,但係管理方面會由我老公公司負責。」

問到千嬅係咪想要多啲時間陪下個仔啊?千嬅話:「其實個仔都已經大咗,我都想就返啲時間,喺我適合嘅時間我繼續我嘅工作,雖然老闆已經好就我,但係某程度上大公司始終都要跟返佢哋嘅schedule去做,人哋唔會就你復活節啊暑假啊咁㗎嘛。」

咁加盟費係咪好高?千嬅話:「我就係唔想有壓力唔想有加盟費先簽俾老公,我同老闆其實仲有合作空間嘅,不過我就想自己有自主權。」

同老公合作怕唔怕有拗撬?千嬅話:「我都有擔心嘅,但係我會以家庭為先。」林生咁多公職在身,嚟緊係咪會分配少啲時間喺娛樂方面?千嬅話:「呢個我唔清楚,不過佢做生意非常有經驗,好多嘢我都向佢請教,行政上嘅嘢我就唔方便答。」

娛聞樂陪你走遍全球追星,即Like「娛果」FB 專頁!
BannerBanner