【承壽星貴言】譚耀文預祝添丁 城城造人要度期

更新時間 (HKT): 2018.03.19 17:40
(攝影:張俊銘)

今日開幕嘅影視娛樂博覽,真係好多星撐場,繼朝早嘅古天樂同黎明等現身後,下晝輪到郭富城,佢代表自己主演電影《風再起時》現身,同場仲有合演嘅譚耀文同周文健,該片另一男主角梁朝偉雖然冇現身,但就拍片支持。

現場有播《風再起時》嘅部份片段,城城喺戲中演「四大探長」之一嘅磊樂,佢話以往劉德華演呢個角色深人民心,自己曾經演過佢個仔,所以今次演出反而冇壓力,導演翁子光仲讚佢演出好過《踏血尋梅》。提到戲中有城城講粗口嘅場面,佢話:「其實冇乜所謂,因為嗰個年代比較粗鄙,自己嘅角色亦係唔識字嘅,所以比較多助語詞同講粗口。」城城仲話因為套戲有描述番番香港當時嘅生活,無論係造型定道具各樣,都符合番歷史,就算食支煙都係冇濾咀。城城話自己今次由30歲演到90歲,18至20歲嘅年輕部分由徐天佑演出。

提到同偉仔嘅合作,城城話係最多戲份,原來佢哋以前曾經喺大台劇《都巿方程式》合作過一次,城城話當時偉仔只係客串,翁子光都有搵番啲片俾佢哋睇,不過偉仔完全冇印象,睇完都唔記得,所以就趁今次合作係大家一個好好嘅回憶。

另外,今日係譚耀文嘅49歲生日,加上翁子光喺星期五(23號)嘅39歲生日,電影公司安排咗個蛋糕俾佢哋一齊慶祝,譚耀文好識做,乘機講恭喜城城,祝佢早日再添丁,城城就話要順其自然,係天註定,反而佢祝番壽星仔譚耀文,話對方熱愛電影,祝佢早日攞到影帝。

問到城城係咪有生仔計劃,佢話今年要拍3部,年尾又要忙巡迴演唱會,所以都冇特別計劃去造人。

娛聞樂陪你走遍全球追星,即Like「娛果」FB 專頁!
BannerBanner