【閃耀人生女人心-謝玲玲(3)】23歲入豪門 永遠新抱感激奶奶一路幫助

更新時間 (HKT): 2018.03.21 00:00

謝玲玲23歲就息影,走去嫁人,於80年嫁富商林百欣之子林建岳,入門第二年已為林家生下第一個男孫林孝賢,之後再生大女林恬兒、二女林顥伊,及一對龍鳳胎林心兒及孻仔林孝能,為林家生了兩仔三女。

就算95年與林建岳離婚收場,謝玲玲依然與林家關係密切,尤其與奶奶余寶珠,對方更視她為「永遠新抱」。

由台灣大明星變成豪門新抱,嫁到香港,生活大轉變。回想初入豪門那段日子,謝玲玲說:「我覺得呢個係整定,命中安排,我拍戲又唔係咁鍾意,不過每個女仔都有一個夢想結婚生仔,我都好想有一個家庭,所以結束咗拍戲。

「一開始都有少少緊張,完全新嘅家庭。台灣同香港好唔同,香港好國際化,自己唔識講中文,唔識講英文,嚟咗香港慢慢適應。後生時候我同奶奶住,佢哋屋企全部係馬姐,講廣東話。

「佢哋唔識講國語,1980年,都好快適應,始終都後生,廿幾歲,我都有買嗰錄音帶,見到人都必須要講(廣東話)。嗰時後生容易學,好快識講,不過講得唔正,到o依家都唔正,仔女同奶奶見我音講得歪咗就會笑,講咗咁多年,『我』字都係講得唔係幾好。」

嫁入林家與老爺奶奶同住,傳宗接代當然首要任務,她結婚翌年就一索得男:「長輩想你快啲有BB,第一年半生咗個仔,係老爺第一個男孫,佢哋係潮州家庭,跟住生咗兩個女,奶奶都話一個仔太單薄,要生多一個仔,先至生多最後一胎,一仔一女。」

豪門的生活模式,謝玲玲過的那種,跟無綫劇集不大一樣。謝玲玲的「林家少奶生活」,係要返工。「我同老爺奶奶住,奶奶係Business woman,日日返工,我就日日跟住佢去工場、食晏,所以一啲都唔寂寞,跟住生咗細路哥,咁就要睇住啲仔女,所以都不斷學習學進步。」

如果「新抱」同「人母」係一份工,咁呢份工,挑戰無疑更大,責任亦更大,而且,冇得退休。「好多謝奶奶一路有幫我,一路都有人幫助,一生都好多貴人,不停喺我身邊出現。」

苦心做虎媽,有苦自己知,子女大了才懂感激,不過曾因仔女讀書問題,與奶奶有爭拗,奶奶曾同她講:「唔好逼佢哋讀書,讀傻咗佢哋,你想佢哋做狀元咩?」

這個虎媽有幾「虎」,明日講。

娛聞樂陪你走遍全球追星,即Like「娛果」FB 專頁!
BannerBanner