【陀仔定女?】挺肚照着高踭鞋 張新悅:完全唔Care

更新時間 (HKT): 2018.03.21 20:32

張新悅、翁嘉穗、陳爽同曹敏莉等今日到中環出席珠寶店周年慶祝活動,早前宣佈再陀B嘅張新悅(新聞連結: http://bit.ly/2HThsR7 )以泡泡裙、腳踏高踭鞋現身,見佢四肢仍然纖瘦,佢話:「預產期係7月,因為唔知幾時有咗,所以唔知實際幾多周。」問到腹中塊肉性別?張新悅就保持秘:「因為之前只係睇過一次醫生,照得唔清楚,復活節之後先會再見醫生,所以暫時唔肯定,但好多人猜測,其實我真係一不小心。仔女其實都冇所謂,因為係唔小心有咗,所以完全唔care,我又冇丁屋冇丁權,老公只希望BB健康,慣咗成屋都係女。」

講到今日着高踭鞋出席活動,張新悅笑稱:「我差在未踩鋼線咋,一直都有做瑜伽,之前亦有行山,唔算太辛苦。」今次懷孕同大女相差近10年,佢覺得人生之中陀B餵奶時候大部份都工作緊,機能都好辛苦,再次面對又肥又腫有啲唔開心,仲話對上懷孕時就懶係瘦,但係BB出咗世之後比較難搞,今次會食番多啲嘢,等BB出世唔好咁細粒。

另外,翁嘉穗就話平時家中珠寶都係丈夫送贈,將來都會留番畀啲仔同新抱,有人提議佢追多個女,翁嘉穗即刻耍手話:「我OK啦,兩個夠數。」但張新悅都話係一不小心又有咗,翁嘉穗話自己會安全啲。另外,翁嘉穗提到大仔Jason 9月會去外國讀書,現正考慮美國或加拿大,而細仔Kasper就已經兩歲幾上緊學前班。

娛聞樂陪你走遍全球追星,即Like「娛果」FB 專頁!
BannerBanner