【Fans留言買唔到】演唱會今朝開賣 Gin Lee緊張到瞓唔著

更新時間 (HKT): 2018.03.21 16:10
攝影:馬建華

李幸倪(Gin Lee) 今日到商台接受訪問,Gin Lee嘅演唱會門票喺今朝開賣,佢坦言心情緊張到成晚都瞓唔著,雖然仲未問公司銷售情況,但見到好多fans留言都話排咗好耐隊都買唔到,佢話:「我好想加場,因為如果花咗咁多心思只係做一場,驚自己唔捨得,身邊嘅朋友都不停向我訂飛,數量係20張、30張訂,得到大家支持,令我都好感動。」

Gin Lee仲話到時喺馬來西亞嘅小學、中學同學及親戚朋友都會專程來港支持,今次演唱會會以耳目一新嘅造型同大家見面,亦係跟全新嘅造型師合作,噚日記者會上大露背造型就係第一次嘅合作,講到演唱會上會否用會否性感?佢話:「最緊要係靚同安全我就ok,冇話設底線要幾多。」公司剛為佢推出精選大碟,更加向舊唱片公司洽談佢2011至2013年嘅作品,佢覺得好感動,令自己作品聚集一齊。

吳嘉熙(Cheronna)今日到商台宣傳新歌《把持》, 單飛工作感覺冷清,又要熟背曬啲歌詞,希望演出時唔好失準。現時都要keep fit減肥,以前曾經好極端地試過7日、10日斷食,結果令到胃部不適兼情緒不穩,現時就控制飲食清淡同做運動。

平日Cheronna都有入廚,但入到廚房就會雞手鴨腳,男友黃奕晨經常從旁睇實,以免闖禍,佢仲試過開火槍差啲燒咗廚房:「 我比較鍾意煮中式嘢,例如蒸肉餅、蘿蔔糕,而男友就鍾意煮西餐。」另外早前未有機會向男友爸爸夏雨拜年,稍後會入場支持世伯舞台劇演出,另外佢為咗氹男友,以高價買咗Bruno Mars演唱會門票,佢笑言:「如果當日佢有工作,我就同Jessica去。」

娛聞樂陪你走遍全球追星,即Like「娛果」FB 專頁!
BannerBanner