【閃耀人生女人心-謝玲玲(4)】五子女全日受補習老師監督 虎媽:一定要碩士

更新時間 (HKT): 2018.03.22 00:00

為林家誕下五名兒女,謝玲玲做母親的職責絕不輕,管教子女方面,二三十年前她已是「怪獸家長」一名,仔女要讀書成績好,全日有補習老師。有段時間,謝玲玲請來一位補習老師,「成個晏晝都係屋企,一個補完又一個。」然後,學芭蕾舞、學琴、學小提琴、學功夫……年終無休。

謝玲玲還會體罰:「我都係俾爹哋媽咪喺屋企打,好嚴,所以我對仔都覺得要嚴,都惡都打。你第一次就咗佢,就要成日就佢,唔俾佢哋覺得媽咪係OK嘅,尤其係讀書,成績唔係最重要,但注重學歷,佢哋係富二代、富三代,唔好俾人感覺唔讀書都可以。」原來一切,都是因為子女是含金鎖匙出生,是富三代。

為了令子女更「貼地」,謝玲玲試過送大女去非洲做義工幫人起屋,到孻仔孝能,她曾將他送去司機的公屋住幾晚,體驗一下完全不一樣的生活。

謝玲玲還向子女灌輸一種「危機感」:「自細教佢哋,賺到嘅錢自己搵到先係你,爹哋媽咪嫲嫲嘅,唔一定要畀你,或者老嗰時陪我多,俾我身邊啲人,好多老人家願意俾佢工人都得。

「你知潮州人都係注重係仔,我哋家庭都有,生意傳仔唔傳女,所以特別要女讀多啲書,就算老公再好,有幸福家庭,都要獨立照顧到自己。至於仔呢,林家都會安排,佢哋好幸運,爸爸都已經打好好基礎佢哋。」

阿媽唔易做,謝玲玲要飛英、美兩地陪仔女面試,又要陪太子讀書増值自己:「細嘅時候,同佢哋講英文,佢就會執著我講啲音唔係咁準,我就會同佢哋講,『如果好似你哋咁lucky,一生出嚟就學英文,我會講到好過你哋啦。』」

大仔、大女同二女都擁有碩士學歷,謝玲玲直認有一種虛榮心,而且,有啲走火入魔,要「贏晒」嘅心理:「我睇過一篇文章,其實仔女有冇讀書、有冇成就,係媽咪虛榮感,呢方面我都承認嘅,我一定要佢哋讀到碩士、博士,講出嚟就自己都好proud of,好開心。」與林建岳離婚後,謝玲玲變了單親媽媽,更添辛苦:「我自己要做埋嚴父慈母,一個人乜都做埋,如果兩夫妻,一個可以扮黑面,一個可以扮白面,嗰陣時乜都要做晒,如果要我重新嚟過,唔好咁惡。」

謝玲玲道:「有次,帶埋細仔同朋友去飲茶,佢扭計。當時七、八歲,旁邊啲人叫我唔好咁樣,我就話:『請你唔好出聲,我o依家教仔。』o依家諗番起都幾傻,以前太過著重『我係媽咪,要贏晒』,其實o依家諗諗吓做媽咪唔係一定要贏晒,都可以好好同佢哋講吓。o依家我都改變咗,唔係好似以前咁我講嘅嘢就一定要聽,o依家會商量吓。」

現在仔女都成長了,做了婆婆的她,亦有領悟:「o依家我好錫孫,有少少補賞我以前冇enjoy同我仔女嘅感情,一齊玩嘅感情,所以o依家睇到啲孫會好開心,對住孫完全冇壓力同負擔,剩係錫佢同愛佢就得,所以我同奶奶傾起,o依家位置調轉。」

娛聞樂陪你走遍全球追星,即Like「娛果」FB 專頁!
BannerBanner