【閃耀人生女人心-謝玲玲(5)】同林建岳離婚 謝玲玲傷心一年幸有奶奶撐

更新時間 (HKT): 2018.03.23 00:00

嫁入林家做豪門新抱,謝玲玲做足相夫教子的職責,不過她與林建岳的婚姻,因王祖賢的介入,於95年離婚收場,十五年婚姻生活劃上句號。

雖然與林建岳夫妻情盡,但謝玲玲與林家關係情不變,尤其是奶奶余寶珠,接近40年的婆媳關係依然親密,謝玲玲更贏得「永遠新抱」的美名。

對於奶奶余寶珠,謝玲玲視她為貴人及親人:「好重要親人,我成日對仔女咁講,我同我媽咪相處20幾年,跟住你大後半生,好似我同奶奶相處到依家有37年,比你自己媽咪更加要親,對奶奶好似對你媽咪一樣尊重。奶奶係好女強人,好叻,我啱啱嫁過嚟,好似個小女人,我乜都唔識,跟住佢學咗好多嘢,自己唔識咪跟佢學。」

雖然離婚,對奶奶仍然情永在,謝玲玲認為:「婚姻係你同對方大家冇辦法繼續落去,但係我啲仔女都係姓林,呢啲血脈無可能斷。我係離婚,啲仔女、爹哋媽咪冇一齊,但其他嘢係一樣,所以我同奶奶冇必要唔來往,可以繼續呢個親情。我好感恩佢,一路以嚟好支持我,我哋好多冇講,心照,呢個親情好難得。」

入行做大明星,嫁得好,有五名仔女,謝玲玲的人生路一直平穩,卻遇上婚姻失敗,對她而言是人生最大挫折:「因為我覺得幸福嘅女人最緊要係婚姻,當你冇辦法擁有嗰個時候,就好努力點獨立、生存,將自己人生行去另一面,更加增值自己。」

當年婚姻失敗,謝玲玲傷心了一年,不過因小朋友關係,始終都要堅強:「始終仔女細,每天都必須都要處理,好快就行過去,冇人幫到你。我成日同仔女講,你想開心唔開心,都係自己把握,好似呢杯水,係一半定冇,都係自己評論。

「我有一樣好,我永遠諗你擁有好多,呢一生人嚟講,我好滿足,好幸運,淨係婚姻一樣嘢無咁好,但係人生唔可能十全十美。」

重提舊事,謝玲玲淡然表示已過去:「都好快過咗去,你諗吓時間過得幾快,我大仔都36歲,所以人生其實好短。好多時你失去啲,一定得到啲,我好多時間陪五個仔女。」

婚姻縱使不完美,若可再重頭揀一次,會否依然想擁有這個家庭?謝玲玲說:「係呀,仲多謝個女生咗兩個孫畀我,所以我覺得好開心。我覺得五個仔女同孫係我一生中最重要。」至於愛情,她坦言:「我都唔記得咗,冇時間諗呢啲嘢。我覺得依家係人生中最開心時候,好滿足現狀,都幾好,其餘啲嘢就順其自然。」

娛聞樂陪你走遍全球追星,即Like「娛果」FB 專頁!
BannerBanner