【不設巡迴】黃子華重申係最後棟篤笑:101%香港本土嘅題目

更新時間 (HKT): 2018.03.24 11:37

噚晚有一個「地道香港仔」突然宣佈「收咪」。熟悉子華嘅fans會明白,因為子華神真係已經唔係第一次話「最後一次」——留意番,唔係話子華神次次開棟篤笑都話係最後一次,而係,佢不止一次於訪問中提到,準備開最後一次棟篤笑。

真正的子華神信徒,心中明白,亦心中有數,深知子華這個決定,計劃經年,不是衝動。

套用番2016年子華接受「燈神」蕭若元訪問時所講:「我冇乜遺憾,我江郎才盡咗好多年,但江郎才盡得嚟,我仲好有興趣做多一次棟篤笑,但你放心,唔會係呢一、兩年嘅事,因為我都做唔到。

「我想釐清一樣嘢,我喺香港過咗咁多年,我係地道香港仔,依家由我認識嘅香港發展到今日香港,我點能夠說一個香港故事,或一個我自己嘅故事,而同大家棟篤笑多一次。其實好多嘢笑唔出,唔知點笑,大勢係悲觀,人類從來都係悲觀嘅,作為一個香港人,我希望嚟緊一個騷,去總括一下自己。」

但不熟悉子華的人,總以為今次突然宣告「收咪」,是一個宣傳伎倆。

所以噚晚子華接受傳媒訪問後,再補拍一條片,標題十分簡單,就係:唔好意思,不厭其煩,最緊要清楚。

【影片在此: https://bit.ly/2GlGvPK 】

今次子華呢個《金盆(0浪)口》棟篤笑,暫定有12場,是否加場視乎反應。十八禁。即不歡迎十八歲以下人士入場。理由在此:  https://bit.ly/2G4sPoP

不少未夠秤嘅網民都激動留言嗌唔好,亦有人話:「如果今次都睇唔到,就真係同絕種動物一樣,只能從紀錄片中重溫。」

就咁嘅,香港人買演唱會飛,難度同買樓差唔多,特別係依家亞博館唔再同快達票合作、改同炒飛網/中介網站StubHub合作,由StubHub負責賣飛,包括25%最靚位(新聞連結: https://bit.ly/2GWCzTz )仲要同大陸人爭,真係好灰。

今次子華神呢位「地道香港仔」講明,佢呢個最後棟篤笑,係講香港本土。

咦,咁講法,鄰近經濟強國嘅人,未必睇得明,睇完又要鬧,咁不如唔好搶飛喇,留番「地道香港仔」黃子華最後一個棟篤笑俾香港人。

因為地道香港人已經再笑唔出。唔該晒。

娛聞樂陪你走遍全球追星,即Like「娛果」FB 專頁!
BannerBanner