【手作仔】送電視機暖包俾男友 黃翠如:佢睇完丟埋一邊

更新時間 (HKT): 2018.03.24 17:46

黃翠如同黃浩然今日喺尖沙嘴出席ONE PIECE活動,同粉絲大玩遊戲,黃浩然仲即場獻唱《友情歲月》同《明年今日》仲大派簽名相。

黃翠如透露噚日同男友蕭正楠慶祝41歲生日:「原本扮得一個朋友黎食飯,仲安排咗間四人細房畀佢,佢仲話『今年生日咁過呀?』其實所有朋友喺間大房等緊佢,係黃長興安排嘅。」

黃浩然亦係座上客之一:「阿蕭早幾日話23號食飯,我仲扮嘢問佢咩事,佢窒一窒話係佢生日。我同袁偉豪之前都冇話去,之後先黎,不過最驚喜係曹永廉,佢喺橫店用facetime話自己除緊頭套黎緊。」

問黃翠如送咗咩生日禮物畀男友?佢話送咗好實際嘅野,記者即笑問係咪送個BB畀佢?黃翠如話用暖包畫咗個電視機畀男友:「佢話想要電視機,不過買唔切咪畫住先,又可以隨時睇幾好呀,不過佢睇完丟埋一邊。」

至於蕭正楠將為《美女廚房》擔任主持,問翠如會唔會做嘉賓?佢話:「唔制,成日畀佢踩,我佢讚到我心花怒放先啦。」身旁嘅黃浩然話:「你唔去,佢搵多啲美女去仲好。」

娛聞樂陪你走遍全球追星,即Like「娛果」FB 專頁!
BannerBanner