【百花齊放最好】網劇誓成主流撼低電視? 張繼聰:冇得去比較

更新時間 (HKT): 2018.03.25 16:08

被大台封殺嘅張繼聰,喺網劇《向西聞記》主演首個單元《畜生傳心師》,對於原創網劇衝擊傳統電視膠劇,阿聰接受《蘋果》電話訪問力撐網劇係大勢所趨:「自己覺得現今社會,娛樂媒體越嚟越多元化,網劇會係其中一種大勢娛樂,其實喺世界各地好多地方,網劇已經係好主流嘅娛樂,所以我覺得一個健康嘅市場,除咗電視作品之外,網劇都可以並行。」

阿聰認為網劇同電視劇對撼,唔係一種VS嚟,應該係百花齊放:「咁先至會有好多好作品、好演員、好導演、好編劇、好監製,咁先至會有更多好機會,我覺得應該係一種良性競爭,說到底始終媒界唔同,電視劇需要受到一啲指引或廣管局規限,呢樣嘢都好合理嘅,咁網上可能少咗一啲限制,所以我覺得冇得去比較,應該係大家都做好啲,香港觀眾就有眼福,有多啲好嘅作品睇。」

首次拍網劇嘅阿聰表示:「因為係網劇,作品長度、拍攝題材都同我以往拍開嘅劇集好唔同,所以對我嚟講好有新鮮感,所有演員都係第一次合作,拍攝過程好愉快。咁我覺得我哋公司呢個系列網劇係好好嘗試,台前幕後大家好認真拍攝,蕭生都係好有呢種觸覺畀我哋去試呢個市場,所謂網絡文化其實有好多好有趣、生活化作品,蕭生好聰明攞咗呢啲元素將佢拍成網劇,亦都係一個好有誠意作品,希望觀眾會喜歡。」

娛聞樂陪你走遍全球追星,即Like「娛果」FB 專頁!
BannerBanner