【真係喎!】Juno唔到契女生日party Kay:佢形象同主題樂園唔係好夾

更新時間 (HKT): 2018.03.25 13:34

謝安琪(Kay)同陳柏宇(Jason)噚日係尖沙咀出席「地球一小時2018」倒數典禮,並擔任活動大使,Kay話佢好榮幸連續第十年做呢個大使,仲話著緊對鞋最少著咗五年,鼓勵大家減少購買,Kay話自己係一個「斷捨離」嘅人:「我好少會買冇需要嘅嘢,用得到嘅嘢一定會Keep住用,我啲小朋友都接收咗唔少二手衫,我又唔會介意,佢哋咪一樣係健康快樂咁成長。」

Kay女兒張靖(Karina)1歲生日喺主題公園搞派對,講到契爺麥浚龍(Juno)?Kay話:「Juno感冒嚟唔到,同埋佢形象同主題樂園唔係好夾,留晒鬚,等佢下次約去啲型嘅地方,我又將個女打扮得型啲先一齊玩喇。」

講到網民勁讚張繼聰身材好,有爆肌麒麟臂,Kay話:「係呀,佢喺樂園入面好似變咗個景點咁,好多細路仔會走來篤佢手臂,叫佢影相!」

另外,陳柏宇最初唔知咩係「斷捨離」,當佢知道以後都舉腳贊成:「以前都鍾意買吓衫,發現買之後着來着去都係嗰兩件,我都希望可以感染到我老婆,佢成日話我掉嘢,我話我唔係掉係捐出去,我明白佢重感情,希望佢可以將呢個好事宣揚開去,將佢啲有感情嘅嘢送畀其他人更有感情。」

娛聞樂陪你走遍全球追星,即Like「娛果」FB 專頁!
BannerBanner