【四大外父...】方媛以「城嫂」身份出活動 城城避談家事

更新時間 (HKT): 2018.03.26 12:43

郭富城、周柏豪同謝金燕等噚晚到澳門參與《德晉集團春茗晚宴》,城城壓軸現身,佢話每次去澳門見到啲建築物都有夢幻感覺,問到會唔會帶半歲大嘅囡囡Chantelle去玩?佢話:「將來啦。(係咪陪囡囡食完飯先嚟?)我今日(昨日)做咗運動,為一陣演出準備。」

城城透露今天將飛往北京拍廣告,四月份開拍新戲。問到睇唔睇好古天樂攞今屆金像獎影帝?城城話:「我唔係評審又未睇,講出來唔公平,暫時唔講太多。」佢話去年忙於拍《風再起時》及處理家事,未有時間睇入圍作品,雖然今年有工作未能出席金像獎,但仍然會支持香港電影。

對於黎明將榮升做爸爸,城城笑言當然知道,因為社交平台不時有人評論,佢話:「 之前講咗如果係真會恭喜佢,娛樂圈好多事情發生,我係娛樂圈嘅人,但係唔太了解嘅嘢,唔好由我答,好似邊個攞男主角,關於Leon其他事。(如果Leon生埋女就變成四大外父?)又嚟,呢啲唔講。(咁4月18日點慶祝?)咩呀?(結婚一周年?)講緊工作突然講我嘅嘢,當然交俾我自己,工作事我可以同大家講,但家庭事少講為妙。」

另外,有指方媛將會在今個星期三(28號)出席護髮產品活動,今次係得到老公首肯,方媛首次出席香港活動,仲會接受傳媒訪問,同場仲有薛凱琪、馬詩慧等藝人。

娛聞樂陪你走遍全球追星,即Like「娛果」FB 專頁!
BannerBanner