【好浪漫呀!】周杰倫包廳食海景晚餐 細心陪實昆凌上車

更新時間 (HKT): 2018.03.26 23:51

【新增內容】

周杰倫十場香港站演唱會噚晚完咗,幾日都未見老婆昆凌,今日留喺香港忙裡偷閒,日頭約咗《頭文字D》拍檔余文樂遊走港島,先係去咗灣仔一間冰室,轉頭又去咗石板街,跟手再上埋山頂。

周杰倫同余文樂約於晚上8點左右離開山頂,據知佢哋係去咗蠟像館拍攝,之後周杰倫同余文樂就坐車去咗尖沙嘴一間餐廳。

呢間餐廳有戶外位可以海景,有食客話見到戶外位有好多布幕圍住,周杰倫大約喺8點半去到餐廳,無耐有幾個工作人員好緊張咁行出嚟視察環境,喺差唔多時間,昆凌就搭扶手電梯出現,喺工作人員陪同下入咗餐廳。

到咗十一點半左右,周杰倫就同埋昆凌喺一班工作人員陪同之下,離開六公館直回紅磡都會海逸酒店,不過因為走嘅時候太混亂,原本佢哋兩公婆隔開四五步嘅距離,昆凌行行下發現唔見咗老公,就立即回頭等埋周杰倫,而周杰倫都好細心咁扶住老婆上車。

娛聞樂陪你走遍全球追星,即Like「娛果」FB 專頁!
BannerBanner