【韓流】婚照曝光!42歲崔智友望住圈外人老公甜笑

更新時間 (HKT): 2018.03.29 20:46

【新增內容及圖片】

韓劇《天國的階梯》嘅42歲「催淚天后」崔智友今日驚爆結婚消息,根據韓國傳媒報道,崔智友今日同圈外人以非公開形式結婚,只邀請家人出席。據知崔智友同男友交往近1年,男友於今年初求婚,但考慮到男方係圈外人嘅關係,所以婚禮低調進行。據知其男友係普通職員。

婚訊爆出後,崔智友喺官方fans網站親寫親筆信認結婚,同時將喜訊分享畀粉絲。親筆信內容寫道:「今日突然向大家傳遞一個幸福嘅消息,今日我將與人生嘅另一半踏入新嘅階段。今日下午將喺家人嘅祝福下低調舉行婚禮,依家我將與心愛嘅佢組織溫暖嘅家庭,會互相尊重、愛護對方、幸福地生活。籌備婚禮時未能向大家透露婚禮一事,都有啲過意唔去,但考慮到對方及家人並非圈內人,擔心佢哋會感到負擔,所以希望大家諒解。如果得到長久以來關注住我嘅大家嘅祝福,今日將會係無比幸福嘅一日。今後我會永遠記得大家嘅愛及支持,繼續以演員身份拍更多好嘅作品回饋大家,多謝,我愛大家。」

而崔智友所屬YG事務所就指從未聽聞有關消息,現時確認中。喺崔智友公開親筆信認婚訊後,YG事務所亦發聲明稱崔智友與圈外男友拍拖近一年,今日喺首爾某場地低調舉行婚禮,所有儀式都以非公開形式進行。

崔智友於2009年時曾公開同李鎮旭嘅戀情,兩人於2011年分手收場。

另外友姐代言嘅珠寶品牌「Golden dew」就賀友姐結婚,公開佢去年拍攝嘅婚紗造型廣告照片,祝佢幸福快樂。

約香港時間晚上8時40分,崔智友透過YG事務所公開婚紗相,當中包括友姐身穿全白婚紗並手持花球嘅相,好不高貴優雅,同時亦有友姐望住老公甜笑嘅黑白照,不過基於老公係圈外人嘅關係,只得背影出鏡。

娛聞樂陪你走遍全球追星,即Like「娛果」FB 專頁!
BannerBanner