【五月天開賣】朋友被孟加拉排隊黨打傷 福建大學生:佢腦震盪

更新時間 (HKT): 2018.03.29 13:24

上周六凌晨有市民喺尖沙嘴金馬倫里通利琴行門外排隊時,遭孟加拉排隊黨打傷(新聞連結: https://bit.ly/2pNdxPa )。

五月天門票今日公開發售,有近百位市民喺尖沙嘴通利排隊,來自福建嘅大學生王生稱之前受傷嗰個係佢朋友:「佢腦震盪、手有啲骨折,目前休息緊,本來佢都想嚟買飛,o依家變咗我代佢買,如果買唔到飛,會非常失望。」

佢又指見住啲南亞裔人士買完張敬軒轉頭又嚟排隊:「好疑惑佢哋係張敬軒定係五月天粉絲,我哋係五月天嘅歌迷,千辛萬苦嚟一次,大家都係學生,儲咗幾個月錢先嚟買飛。」問到佢哋想買幾多張門票?王生就話:「總之每人身上有幾多錢就買幾多,」

王生稱國內有一個五月天粉絲團都會互相買飛,到買咗幾多錢就幾多錢,邊個得閒就去睇,王生坦言:「原本佢哋有18個人,不過當中有一個因私事要先走,另一個就係早前受傷嘅朋友,所以得番16個,我女朋友鍾意五月天16年,係忠粉嚟,我自己就鍾意咗五月天3年,希望買到最貴嘅門票,買完都要趕車走,紅館騷之前冇睇過,因為啲飛炒到5、6千蚊一張,我哋係學生,冇咁嘅能力買黃牛。」

中午12點55分,啱啱有6個排隊入內,亦陸續有人買到飛落樓,來自福建嘅王生成功買飛,同另一朋友每人買咗四張最貴$1180門票,同埋已經幫受傷嗰位朋友買埋。

此外,香港人楊生贊成實名制買飛,到時未必可以幫朋友買飛,最多叫埋啲朋友一齊嚟都係開心,自己鍾意咗五月天約3、4年。

娛聞樂陪你走遍全球追星,即Like「娛果」FB 專頁!
BannerBanner