【小心WhatsApp黑客】黃建東媽媽遇點數卡騙徒 失8萬元好肉赤

更新時間 (HKT): 2018.03.30 23:00

喺《降魔的》番外篇有份演出嘅黃建東,喺今晚9點半左右於ig提醒各位老友記,小心「點數卡騙局」……事緣係,黃媽媽中咗招,被騙徒冒認「親友」騙走8萬元。

呢類假冒「親友」嘅黑客,最近由Line發展到去WhatsApp,黃建東用咗好多emoji表示驚訝,又話已經去咗警署落緊口供,有朋友安慰佢唔好怪責媽咪,當破財擋災,最緊要都係同媽咪講清楚,唔好俾呢啲事再發生。

黃建東今晚回覆《蘋果》指事發後自己要開工,媽咪喺親人陪同下去咗警署落案,黃建東苦笑話:「我都想唔係真。」問到黃媽媽點解失策上當,佢話:「姨丈畀咗WhatsApp我媽咪,叫佢好趕急買點數卡,媽咪唔知WhatsApp都有入侵,以為只有Line,佢情急下就買咗幫佢,當時媽咪覆話教緊跳舞堂,完咗先,騙徒話趕急,媽咪完咗即去便利點買,媽咪都唔知乜嘢係點數卡,咁純粹怕姨丈有事。」黃建東事後都有問番媽咪,點解唔了解清楚先,但媽咪實在太擔心,喺事發後先慢慢清醒,黃媽媽報警備案回家報,心情低落。

黃建東亦都收過相關訊息,但一直知道係呢啲係騙案,只係冇諗過媽咪會中招,佢希望呼籲:「我好想同長輩、公公婆婆講番,凡要動用到你哋荷包、經濟,一定要聯絡子女,或問番當事人,做行動前同家人商量,千萬唔好趕急同魯莽。」8萬數始終都唔係一個小數目,點樣可以買到咁高金額嘅點數卡呢?店員只要溫馨提示一下,可能就解決咗一單騙案。

另一邊廂,周家怡早幾日都有喺ig貼出一段對話,佢話媽媽同個黑客講咗好耐,最終黑客敗走,周家怡就話:「其實我媽咪唔係醒呀,佢真係問六位數字係幾多,我媽咪咪計個、十、百、千、萬、十萬囉。嗰個人再覆佢十萬,我媽咪話係呀,跟住嗰個人再問,我媽咪真係真心問再加幾個字就十幾萬,仲問佢係咪中咗六合彩,真係呼籲大家收到呢啲短訊千祈唔好中招,唔好咁容易將喺電話出現數字話畀人聽。」不過都係嗰句,如果擔心有咩突發情況,都係打個電話問清楚先好呀。

娛聞樂陪你走遍全球追星,即Like「娛果」FB 專頁!
BannerBanner