【韓流】崔智友前日做人妻 「泰華哥」 送祝福

更新時間 (HKT): 2018.03.31 13:50

曾演出經典韓劇《冬日戀歌》、《天國的階梯》嘅42歲女星崔智友,前日突然宣佈婚訊,閃嫁拍拖近一年嘅圈外男友,而友姐婚禮一切從簡,謝絕贊助同禮金,並邀請家人、親戚及相熟朋友人等約100名賓客到首爾某酒店出席婚禮。雖然老公係普通上班族,但友姐亦唔介意對方嘅出身,據知老公會搬入友姐位於江南區嘅豪宅。

而喺《天國的階梯》中飾演「靜書」繼兄「泰華哥」申鉉濬噚日喺節目《演藝家仲介》上被問到有關友姐結婚一事,佢就向友姐送上祝福。申鉉濬被問到有冇受邀出席友姐嘅婚禮,申鉉濬冇出聲,暗示冇受到邀請,隨後表示:「我都係透過報道先知佢當日結婚一事,當年我結婚時收到佢嘅禮金,依家唔知點做好。」之後申鉉濬亦表示:「(崔智友)係同我合作過嘅女星當中,樣貌同心地一樣咁靚嘅女演員,新郎真係好運,祝兩位幸福,希望未來聽到兩人嘅好消息。」

娛聞樂陪你走遍全球追星,即Like「娛果」FB 專頁!
BannerBanner