【哥哥‧15年】由零開始偷偷想到落淚 明哥記住了這一幕:走廊的煙break

更新時間 (HKT): 2018.04.01 00:02

4月1日,無心睡眠,想你--張國榮。

「哥哥」張國榮離開了15年,02年他和黃耀明合作推出EP《CROSS OVER》,成為哥哥最後的唱片,當時哥哥已受抑鬱症和胃酸倒流困擾,錄音期間情緒低落,要休息抽煙解愁,那個畫面,明哥至今念念不忘。

「當時佢有提過籌備緊電影,有少少壓力,好似唔係好順,佢又有少少唔舒服,錄音時察覺佢聲音好沙。」

《這麽遠 那麽近》由哥哥作曲和讀白,其中有句:「我懷疑嗰次把聲好沙嗰個就係你」,就是刻意為哥哥加上去的。主唱的明哥說:「當時佢同我講,佢有少少胃液倒流,所以影響咗把聲。」

「跟住半夜收到唱片公司電話:『哥哥聽日唔會嚟,佢覺得好大壓力,又要拍呢樣又要拍嗰樣,佢覺得都係會頂唔住,你一個人頂住先。』感受到佢開始俾呢個病影響,有啲事會突然間覺得好大壓力,承受唔到,不如cut晒啲programme。」

不過,明哥話哥哥絕對係一支強心針,更被哥哥和唐唐的拖手的畫面震撼了:「佢能夠公開自己性取向,其實對我嚟講,震撼未必係最大,我反而覺得佢同唐生喺街拖住手影相,更加令人覺得場面好感人,呢個係好重要,能夠將同性之間愛嘅感覺公開流露出嚟,係更加大嘅重要畫面。我覺得尤其佢跟住又拍《春光乍洩》,都係畀咗好多動力之後嘅人。」

明哥最喜歡哥哥和王家衛合作的電影,包括《阿飛正傳》、《春光乍洩》:「歌都有好多鍾意,由佢快歌《無心睡眠》、《黑色午夜》到拿手情歌《路過蜻蜓》,仲有一隻歌《玻璃之情》,佢死咗之後先推出,我都覺得好好。當然聽嘅時候好傷感,我諗佢錄嘅時候冇諗過呢件事發生,但呢隻歌後來聽番,其實都預言緊呢件事。生命真係好奇怪,佢留低好多好好嘅歌同電影。」

娛聞樂陪你走遍全球追星,即Like「娛果」FB 專頁!
BannerBanner