【韓流】以為會最快結婚? 崔智友13年前曾接金南珠花球

更新時間 (HKT): 2018.04.04 14:20

曾演出經典韓劇《冬日戀歌》、《天國的階梯》嘅42歲女星崔智友,上周四突然宣佈婚訊,低調嫁拍拖近一年嘅圈外男友,老公身份噚日曝光,據知係年約30多歲、於IT公司上班嘅才俊。

友姐婚禮一切從簡,謝絕贊助同禮金,僅邀請家人、親戚及相熟朋友約100名賓客到首爾西尼爾酒店76樓出席婚禮。據知一對新人冇發出喜帖,現場亦冇指示牌,當日即使於酒店內,都好難發現友姐於該地方舉行婚禮。

相關人士公開友姐婚禮當日嘅詳情,表示一對新人行禮後,就去旁邊嘅餐廳食飯,不過聚餐只有40人參加,婚禮非常低調簡樸。而友姐嘅花球跟喬妹嘅花球一樣,都係鈴蘭。有指因為韓國冇鈴蘭花,必須從外國進口,普通嘅鈴蘭花花球最少要價100萬韓圜(約7,400港元),而酒店準備嘅花球就預計要1,000萬韓圜(約7萬4千港元)。

另外,由於友姐婚禮非常低調,圈中好友都唔知情,當中韓劇《Misty》女星金南珠亦係睇新聞先知。金南珠噚日表示,2005年友姐於金南珠嘅婚禮上接到花球:「當時覺得崔智友好似會最快結婚,因而將花球畀咗佢,估唔到佢13年之後先結婚。」

娛聞樂陪你走遍全球追星,即Like「娛果」FB 專頁!
BannerBanner