【平起平坐】與警務處行動處長同台 城城:覺得已經當咗差

更新時間 (HKT): 2018.04.07 17:46

郭富城、鄺美雲同江美儀等,今日喺荃灣出席「單手掌上壓挑戰閉幕禮」,見證300人紀律部隊締造單手掌上壓1分鐘嘅健力士世界紀錄,佢哋同時呼籲籌款幫助被遺棄動物。

《寒戰》中飾演警隊一哥嘅城城,同真正嘅警務處行動處處長鄧炳強同台,城城笑言戴上黑框眼鏡,係要模仿鄧處長,城城喺台上話:「我戴呢副眼鏡係模仿鄧處長嘅,喺《寒戰》入面係做部門處長,見到鄧處長心都寒一寒、震一震,我同鄧處長都有交流生活,為警隊服務同投放資源,冇警隊出力,又點會有《寒戰》嘅劉傑輝呢?」而佢哋一齊頒獎時,鄧處長搞笑話:「我好緊張,喺電影入面見到佢好有威嚴,好有親和力。」在旁嘅城城話:「我都係飾演緊你。」引嚟全場大笑。城城仲話自己唔做演員或歌手,已經當咗差,連鄧處長都玩埋一份話:「我唔當差都可能做咗演員。」城城話:「命運真係好神奇,今日我哋喺埋一齊,希望我哋會演變成好朋友。」

城城話真係有諗過做警察,佢仲笑言唔知係咪入戲太深,今日覺得鄧處長係自己嘅同事,仲話覺得佢哋嘅級數,喺佢哋領導下保護香港市民,受人景仰,佢話:「唯一係我做唔到警察保護大家,但係我可以用歌聲感染大家。」問到如果囡囡Chantelle大個想做女警,做爸爸嘅贊成嗎?城城就話:「到時先話你聽,太遙遠嘅事。」

城城仲話已經密鑼緊鼓準備嚟緊100場嘅巡迴演唱會,o依家要開始保持狀態,城城話:「今次係自己體能上嘅極限挑戰,今次100場,要3年嘅時間去保持狀態,係辛苦啲,但係我願意接受挑戰。」問到破唔到學友嘅147場巡迴紀錄?城城就話:「紀錄係自己破自己,做到100場自己都好滿意。」為咗今次巡迴,城城犧牲好大,其中城城要食營養餐單,連最愛嘅麻辣火鍋都要戒足3年,同時仲要戒油、鹽同糖,連拍戲選角都唔可以增磅或太大隻,佢話:「破自己紀錄係要付出,體能係最重要,已經開動演唱會模式,I am OK!」巡迴演唱怕唔怕唔捨得個女同老婆?城城話:「我又唔係去3年唔返,唔怕嘅,到時佢已經3歲,應該已經識唱我嘅歌,係開心嘅一件事,我要做一個好榜樣,要努力認真工作,不斷突破自己。」

娛聞樂陪你走遍全球追星,即Like「娛果」FB 專頁!
BannerBanner