【饑饉三十】張艾嘉見證非洲戰亂遺禍:我未必識拍呢啲

更新時間 (HKT): 2018.04.07 16:33

饑饉三十今日喺香港仔運動場舉行,饑饉大使林嘉欣,仲有吳業坤、王灝兒(JW)、關楚耀、許廷鏗同胡鴻鈞等饑饉之星到場支持,而為宣明會擔任左25年義工嘅張艾嘉就帶領眾人宣誓對抗饑餓。

張艾嘉分享多年來到非洲探訪嘅見聞:「啲小朋友受饑饉同戰爭影響,被啲軍閥迫佢地食彈葯,等佢地發癲出去殺人,佢地生活好辛苦。有啲村,成條村嘅人都係得一隻手或者一隻腳。我未必識拍呢啲,但我嘅電影經常提到愛,係好老土,但希望大家可以更珍惜。」

林嘉欣話早前去烏干達探訪,體驗人生首次饑饉三十,今次相對較輕鬆:「喺烏干達餓到差啲嘔水,黎之前我都食定個大早餐打底。我都有同囡囡講,今晚唔可以陪佢地食晚餐,佢地都明白,不過而家小學未可以參與饑饉住,大個啲先。」

坤哥透露出席完開幕禮,會餓住開工拍劇:「我會呼籲埋同劇嘅鄭則士哥哥一齊饑饉,如果可以令身邊嘅人都參與,我就完成到自己嘅任務啦。」

關楚耀透露為大會擔任攝影師:「今次係義務,希望將來可以開個人影展。」記者笑指佢可以為JW影婚紗相,搞到JW尷尬笑:「影咗生日先啦,我6月生日。」

娛聞樂陪你走遍全球追星,即Like「娛果」FB 專頁!
BannerBanner