【一食番就好吸收】衛蘭每月習慣閉食三日:唔睇社交網站、只係飲水

更新時間 (HKT): 2018.04.08 16:00

衛蘭、林欣彤(Mag)、Dear Jane、林嘉欣同老公袁劍偉,噚晚喺香港仔運動場出席「饑饉三十音樂會」,林嘉欣同老公上台分享去烏干達探訪經驗,袁劍偉爆嘉欣喺烏干達其中一件趣事:「有日我放咗兩包薯片喺枱面引誘佢,因為嘉欣最鍾意食薯片,最後佢唔受引誘。」嘉欣即尷尬笑話:「咁嘅嘢都講出嚟㗎!」

Mag話自己冇份去探訪,但會自行饑饉:「以前讀書試過饑饉,最難係身邊冇人陪,試過細佬喺我身邊食炸雞,但只要意志堅定就冇事,其實饑饉嘅定義唔係餓幾多個鐘,而係教育,當地好多小朋友每日面對飢餓嘅問題,所以希望每次可以嚟參與演出,帶力量畀營友,令佢哋再分享畀身邊嘅人。」Mag回想讀中四時,已開始助養小朋友,當時冇錢,係慳埋啲帶飯錢加零用錢去助養,同助養小朋友一直有聯絡,直到上年小朋友唔使再助養,佢再助養第二個小朋友。Mag話:「我都想去同佢見面,有次做探訪係想去非洲探佢,但最終去咗菲律賓,不過一樣咁有意義,希望咩都做吓去幫人,我自己都想成立慈善基金,不過幫人唔一定要有錢至可以做,最重要係盡自己所能。」

同場嘅衛蘭就話每個月習慣做三日閉食:「呢個係信仰習慣,唔一定係食物,唔睇社交網站,或者唔去擔心憂慮都係其中一種,食飯方面,試過戒自己最鍾意食嘅澱粉質同肉類,同埋要祈禱,最難只係飲水,我有朋友試過40日只係飲水,我冇試過,但想試,不過可能要唔使做嘢至可以試。」有冇用過呢個方法減肥?衛蘭笑話:「呢啲方法我唔work,因為一食番就變得好吸收。」

娛聞樂陪你走遍全球追星,即Like「娛果」FB 專頁!
BannerBanner