【第23屆華鼎獎】靚媽林心如仙女裙行紅毯 攝影師嗌「女神」

更新時間 (HKT): 2018.04.08 19:29

第23屆華鼎獎今晚喺澳門舉行,向海嵐、鄧穎芝、張文慈、楊思琦、李晨、洪天明、黎耀祥夫婦、彭浩翔、溫碧霞、吳京、徐錦江夫婦、秦沛同子女姜麗文姜文杰等先後行紅毯。

靚媽林心如行紅毯時好搶鏡,着住一襲灰、綠色低胸雪紡禮服出場,佢今年憑《嫌疑人X的獻身》角逐最佳女主角,佢話開心又緊張。講到自己做咗媽咪,佢就話心態有啲變咗:「身為媽媽,我覺得對於親情,有小孩的角色或是劇情特別打動我,只要看劇本就很有感受了。」喺紅毯受訪期間,仲有傳媒攝影師忍唔住大聲叫佢「女神」。

《戰狼2》獲得「電影滿意度第一名」,主角吳京仲獲提名最佳導演、最佳男主角、《戰狼2》亦有得角逐最佳影片。吳京就話好慶幸:「中國導演的門框容易進,但要活著不容易,所以更多是慶幸和感謝支持。」佢仲話已經有《戰狼3》嘅劇本。

楊思琦獲邀擔任今屆嘅頒獎嘉賓,另外張文慈話最近拍電視劇多,希望有機會拍電影。李晨獲今屆憑《空天獵》提名「中國最佳新銳導演」,佢話無論係導演定係演員都會係挑戰。黎耀祥同老婆一齊行紅毯負責頒最佳導演,不過黎耀祥話無諗過做導演,唔想求其拍啲娛樂片,不過佢冇講到實一定唔做導演,如果突然對人生有新睇法,可能會改變主意。

溫碧霞壓軸行紅毯,佢套晚裝比平時算係少咗幾分性感,佢話今年好忙,會出寫真、開演唱會同拍劇,嚟緊仲要開戲。喺愚人節有報道指佢退出娛樂圈,佢今日就話覺得好奇怪:「睇到都嚇一跳,fans都好驚我退出。」但就話有考慮去美國讀書,但要等多8年,因為想同阿仔一齊去。

娛聞樂陪你走遍全球追星,即Like「娛果」FB 專頁!
BannerBanner