【9%出道】范丞丞完成《偶像練習生》總決賽即失寵?范冰冰似樹熊攬實李晨

更新時間 (HKT): 2018.04.08 11:47

大陸節目《偶像練習生》選拔以韓國新男團選拔節目《PRODUCE 101》為藍本,由全民票選出最後優勝者,以全新男團姿態出道。歷時四個月嘅大陸《偶像》前日選出9位練習生可以出道,包括蔡徐坤、陳立農、范丞丞、黃明昊(Justin)、林彥俊、朱正廷、王子異、「小鬼」王琳凱及尤長靖,組成男團「NINE PERCENT(9%)」成員,呢9位練習生係喺99位大陸參賽者中脫穎而出,頭三位蔡徐坤、陳立農、及范丞丞,分別獲4764萬票、2044萬票、1551萬票,蔡徐坤票數更拋離范冰冰胞弟范丞丞一大截,喺冇明星親友幫助下,仍穩奪冠軍。

雖然范丞丞喺節目中講過想靠自己能力去做、希望第時搵錢多過家姐,不過范冰冰一向好錫呢位細佬,由鼓勵胞弟參加偶像練習生,已將自己微博頭像相,換成范丞丞嘅樣,決賽當日冰冰更微博留言「4個多月的努力,今天總決賽,姐姐今天為你打Call,在證明你自己的路上,堅持下去,無論結果如何,請享受所有的過程,加油」,再次為細佬「宣傳」,而未來姐夫李晨亦有「出手」,將自己微博icon相變埋范丞丞嘅相,父母亦去現場打氣,范父熱情高舉LED燈板應援,一家人行動支持范丞丞,未想到引起網民討論,指呢種「宣傳」喺投票類嘅人氣競爭節目上,似乎對其他練習生唔公平,只希望丞丞係以實力服眾。

此外,日前總決賽落幕,冰冰同李晨即換番情侶頭像嘅公仔相,二人卡通仔樣,每人抱住半個心形;《偶像》總決賽當晚,有網民影到范冰冰同李晨喺搭扶手電梯時,冰冰好似樹熊咁攬實李晨,大晒恩愛,二人又即轉頭像相,唔少網民笑范丞丞參加完總決賽立即失寵!?

娛聞樂陪你走遍全球追星,即Like「娛果」FB 專頁!
BannerBanner