【喺屋企有乜搞?】平日Shopping買金粒 城城:得閒拎出嚟摸吓

更新時間 (HKT): 2018.04.08 19:58

郭富城今日喺中環出席一間投資公司活動,並宣佈佢做代言人,大會即場播出廣告。一身灰色西裝嘅城城獲該公司主席向佢送出用金磚砌出10字紀念品,寓意10周年。城城見證兼祝酒,佢話:「估唔到入行咁多年,拍到第一個金業廣告。記得爸爸以前開金舖,每逢周六半晝去店中幫手,我真正第一份工係一間大規模金業公司,由低層做起,教曉我黃金最保值,以前到o依家升咗3倍。」城城繼續話拍到呢個廣告係緣份:「可能我年紀成熟,好啱廣告形象。」

講到投資之道,城城話鍾意投資買車:「車有速度,藝術感同有歷史,升值能力好高,第二係黃金。」咁城城係咪擁有小金庫,佢答:「黃金俾我好多回憶,可當首飾戴,又可金鏈、金戒指。」係咪會打定龍鳳鈪將來送畀囡囡出嫁?佢話:「係呀,用金嚟做係一個根,我得閒喺屋企會拎啲金出嚟摸吓、戴下,幾條啫,有粗有幼,我鍾意萬字鏈同簡單戒指。」係咪會準備好多畀囡囡將來做嫁妝?佢話:「呢樣好長遠嘅事,交番畀我,多謝關心。」

城城坦承會定期買金粒,佢話:「睇心情,如果得閒出去行街,我唔一定睇衫,有時會去金舖睇吓,始終黃金好保值,可一代傳一代。」城城可有考慮投資開一間金行?佢話:「我做咗代言人啦,爸爸間店都結業咗20年,屋企人話冇做好可惜,我有諗過喺舊址開番一間繼承生意。」

對於舊愛熊黛林即將臨盆,城城即封嘴避談:「我唔講呢啲。」

娛聞樂陪你走遍全球追星,即Like「娛果」FB 專頁!
BannerBanner