【怕洩咗度氣?】保住情緒唔Social 鄭秀文喊一喊輕10磅

更新時間 (HKT): 2018.04.10 19:39
(攝影:沈健程)

鄭秀文(Sammi)、周汶錡、楊張新悅等今日到圓方出席時裝展,Sammi表示拍緊許鞍華執導新戲:「噚晚拍蘊釀情緒嘅戲喊到儍,自己都蘊釀咗好耐,唔敢離開角色,呢場戲仲有B哥哥(鍾鎮濤),見到面都只係打招呼,唔敢講太多嘢,噚晚拍完好似輕咗10磅,成個人輕鬆咗。」

Sammi更公開多謝客串演出嘅劉德華:「佢同許鞍華講,每逢有我都一定幫手,自己好感謝華仔,想買份禮物畀佢,不過佢乜都有,知道佢鍾意食花生醬,但未搵到素食嘅花生醬。」對於華仔同古天樂嚟金像獎爭影帝,Sammi話:「好難揀,如果我係評判會各投一票,古仔已經提名好多次,攞獎係好大鼓勵;華仔係我超級buddy,以我認識嘅佢係唔會介意,因為對佢嚟講冇乜所謂。」

此外,身為兩子之母嘅潮媽周汶錡,啱啱帶2歲大仔Jacques去完菲律賓享受陽光與海灘:「只係可以帶大仔去,到時一個爬一個跑搞唔掂,今次同囝囝喺海灘游水,佢戴住水泡好大膽,叫我唔使理佢,仲全裸游水㖭!自己睇到都好開心。」至於大肚人妻楊張新悅懷胎7個月,預產期7月:「啱啱湊住3個小朋友去完台南返嚟,好攰。」問到腹中胎兒性別?佢就保持神秘:「好似唔係好關大家事,今日好攰,遲啲先講。」

娛聞樂陪你走遍全球追星,即Like「娛果」FB 專頁!
BannerBanner