【《復仇者3》新片段】變型俠醫勁愛Iron Man 奇異博士嫌星爵懶搞笑

更新時間 (HKT): 2018.04.12 14:53

Marvel重頭作《復仇者聯盟3:無限之戰》(Avengers:Infinity War)將於25號上映,最近又有新片段曝光,係behind-the-scenes嚟嘅,原來係一班英雄分享拍攝背後嘅點滴。

片長2分12秒。首先就見到星爵同雷神相遇,「星爵」基斯柏特(Chris Pratt)就話:「好開心銀河守護隊可以加入復仇者,一齊拯救世界。佢(雷神)真係好大隻!」另外就見到鐵甲奇俠三巨頭:羅拔唐尼(Robert Downey Jr.)、姬妮芙柏露(Gwyneth Paltrow)同第一集嘅導演莊法來奧(Jon Favreau)。姬妮芙話:「同好多人合作都好幸福,但同佢兩個合作就有更厲害嘅成就。我哋有好特別嘅友誼。」連「變型俠醫」都忍唔住攬實羅拔唐尼話:「羅拔唐尼就好似我哋嘅教父一樣。」

不過,最搞笑都係「奇異博士」班尼狄甘巴貝治(Benedict Cumberbatch),竟然諷刺星爵懶搞笑:「我以為佢係好有趣,點知我錯喇,佢又悶又唔風趣。」不過其實都係講反話。最後羅拔唐尼就話拍Marvel電影嘅經驗對佢好重要:「真係人生難得嘅經驗,諗返起都有少少掛住。」

另外於新片段中,亦有收錄之前「黑豹」將軍Okoye嗰句搞笑對白:「你說瓦干達對外開放時,我唔知係咁,我以為係引入星巴克或者奧運。」

娛聞樂陪你走遍全球追星,即Like「娛果」FB 專頁!
BannerBanner