【佛系男神】班尼狄信佛參觀韓國寺廟 雙手合十被網民屈冇禮貌

更新時間 (HKT): 2018.04.13 14:31

最近英國男神「奇異博士」班尼狄甘巴貝治(Benedict Cumberbatch)隨大隊去到韓國首爾宣傳《復仇者聯盟3:無限之戰》(Avengers:Infinity War)日前落機時,於機場鞠躬雙手合十打招呼,點知惹來韓國網友不滿,認為佢想扮親民卻無入鄉隨俗做足功課,被有網友鬧:「韓國無呢種打招呼方式」,仲話佢歧視韓國人,但原來一切都係無知嘅網民老屈,因為男神係信佛教。

據韓媒《亞洲經濟》報道,班尼狄於今日韓國時間早上11時左右,與「螳螂女」Pom Klementieff、同行翻譯人員等人,乘坐黑色車前往曹溪寺參觀,並與數名僧人進行約5分鐘嘅對話。

報道引述其中一名僧人指:「一開始唔知佢係邊個,上網搜尋後先知原來係出名嘅外國演員。因為佢對信教好有興趣,所以略略向佢介紹咗曹溪寺及韓國佛教。而曹溪寺嘅負責人士表示,事前冇收到相關通知,估計係班尼狄嘅私人行程。」而負責班尼狄訪韓行程嘅相關人士亦透露:「因為班尼狄一直對佛教情有獨鍾,曾表示到訪亞洲地區時想睇去寺廟,所以帶咗佢去曹溪寺及景福宮。」

而今日班尼狄飛走時,同樣有再做雙手合十動作,證明自己並非為「入鄉隨俗」而以呢種方式打招呼,完全係網民表錯情兼玻璃心。

娛聞樂陪你走遍全球追星,即Like「娛果」FB 專頁!
BannerBanner