【再接再勵】Stephy失落金像影后 小方:咁後生仲有好多機會

更新時間 (HKT): 2018.04.17 14:21

關之琳、方力申同任賢齊噚晚專程去灣仔君悅酒店賀蔡志明老婆蔡李惠莉當選保良局主席,喺噚晚嘅就職禮,蔡志明一家人都出動嚟撐場,其他嘉賓仲有陳細潔、陳小寶、謝玲玲、鄭明明同太子珠寶鐘錶集團主席及行政總裁鄧鉅明夫婦等。關之琳接受訪問時話:「今晚係嚟恭賀蔡太,因汪詩詩同圓圓關係,認識咗蔡太。」問佢會唔會参與慈善?佢話:「可以參與同呼籲,但實際做應該唔會,因為我要忙自己嘅時裝生意。最近傾緊另一個品牌,成日要飛嚟飛去物色廠房同好產品,不過我係愈忙愈開心,但我覺得做商界女強人唔容易,真係要邊學邊做。」

方力申(小方)都係應蔡太邀請嚟唱歌助慶,問佢有冇打電話安慰失落金影后嘅前女友鄧麗欣(Stephy)?佢話:「冇喎!同屋企人去咗日本參加婚禮,噚(前)晚搭乘夜機返嚟,所以冇睇金像獎頒獎禮。我有投Stephy一票,佢咁後生,仲有好多機會,只要努力,自然會再有提名。」

任賢齊就話最近幫緊許鞍華監製嘅新戲客串,戲中佢做鄭秀文(Sammi)嘅男朋友,劉德華做前度男友,鍾鎮濤做佢爸爸,因為都好耐冇同Sammi合作,今次再撞番一齊,覺得覺新鮮!遲吓小齊會再接一部新戲,佢話:「部戲演肥仔,做甚麼事也不成功,原本要增肥30公斤,我好努力一日食6餐,成功肥咗20幾磅,但感覺行路會喘氣,有啲辛苦。」

娛聞樂陪你走遍全球追星,即Like「娛果」FB 專頁!
BannerBanner