【音樂會玩反高潮】播放流浪貓狗被虐片段 小肥:冇咗愛就會發生呢啲事

更新時間 (HKT): 2018.04.20 12:52
攝影:陳慧安

小肥連同音樂人雷柏熹,噚晚上喺旺角麥花臣舉行《談情一世》音樂會,鄭世豪、陳柏宇、黎芷珊及邵仲衡等圈中人捧場。早前小肥已講明今次演唱會大唱情歌,所以全晚由王菲、彭羚及楊千樺,再唱到陳奕迅、張學友、陳昇及許志安等經典金曲都有翻唱,連同自己嘅情歌作品,一共唱咗24首情歌,好朋友陳慧敏擔任演唱會嘉賓,演繹《日與夜》及《誰願放手》。

喺演唱會中段,小肥同觀眾嚟一個反高潮,喺演繹代表作《寵物》期間,螢光幕播出一張張流浪貓狗及被虐待動物嘅相片,演唱《灰飛煙滅》時,就播出唔少城市受戰火摧殘而變成廢墟嘅照片。跟住到《給我愛過的男孩們》時,現場播出唔少經過PS,但係仲可以隱約睇到係世界各國領袖及政治人物嘅照片,當中包括特朗普、習近平、金正恩、李嘉誠同梁振英等。

完騷後小肥接受訪問,指播放流浪貓狗被虐片段係刻意嘅反高潮:「希望畀大家一個反面教材,今次嘅演唱會主題係愛,但如果大家冇咗愛就會發生上述嘅事。」講到今次嘅演出,小肥話好玩但係唔太滿意,因為過程有唔少甩漏:「有啲自己嘅歌都唔記得歌詞,所以要將部iPad擺上台,一路睇住歌詞一路唱。」小肥仲話之前為咗籌備音樂會,每次返澳門都係來去匆匆,o依家做完個騷,可以多啲時間陪媽咪。

娛聞樂陪你走遍全球追星,即Like「娛果」FB 專頁!
BannerBanner