【累鄧超鎖機】鹿晗28歲生日 李晨晒Baby全素顏 網民:完全不像她

更新時間 (HKT): 2018.04.20 12:40

大陸男藝人鹿晗今日28歲正日生日,去年10月大方認愛關曉彤,鹿晗fans知男神封盤,即衝去口誅筆伐關曉彤,二人仍然愛得高調,今日凌晨當然係佢哋放閃時刻,搭正12點,女友關曉彤準時送上甜蜜祝福,留言:「哎呀嘛,生日啦~快樂快樂!」仲貼咗一張鹿晗嘅舊相,鹿晗見到自己呢個蘋果頭look,即自嘲係「村口兒美麗的二丫」,大陸北方話「二丫」意思係睇落有啲蠢,又可以解為「姑娘」。

同時,一眾大陸節目《奔跑吧》成員大前日(17號)先同鄭愷慶祝完32歲生日,噚晚又約埋一齊食飯,同鹿晗慶祝28歲生日,鄧超、李晨、陳赫、鄭愷及王祖藍等都有喺微博留言,鄧超喺微博踢爆凌晨嗰陣,鹿晗未知係眼瞓定有啲醉意,竟然拎咗鄧超部手機瘋狂輸密碼,鹿晗以為係自己部手機,成功鎖死,搞得鄧超要今早先可以送上祝福,鄧超寫道:「我很困…明天六點還要奔跑…但…我有誠信…生日快樂兒子。」為咗報復鹿晗搞到鎖機,鄧超特登揀咗一張鹿晗瞓覺相擺上網。

而李晨貼出一張溫馨大合照,之但係網民將亮點放咗喺Angelababy素顏樣,日前Baby晒完妝前妝後嘅14秒短片教化妝(新聞連結: https://bit.ly/2F195RG ),李晨今次晒出呢張全素顏,唔少網民睇到嘩嘩聲,留言「楊穎怎麼又變樣子」、「Baby完全不像她自己」,更有網民指Baby「素顏鼻」正面睇,鼻樑冇咁挺。

娛聞樂陪你走遍全球追星,即Like「娛果」FB 專頁!
BannerBanner