【畀足面老友】馬明心穎拍拖睇歌舞劇
 李霖恩謝幕感動哽咽

更新時間 (HKT): 2018.04.20 15:50

李霖恩投資近七位數籌辦、一連五場嘅歌舞劇《我就嚟係歌手》,噚晚喺西灣河舉行首場公演,一眾演出者蔡頌思、蔡浩洋、蘇姍及杜大偉等全晚喺台上載歌載舞,湯沛宜及譚嘉荃超性感跳唱羅文金曲《波絲貓》,唔少圈中好友馬國明、黃心穎、陸詩韻、莊思明及陳國峰等到場支持,馬國明同黃心穎亦高調拍拖撐場。導演李霖恩又就大爆每場都有神秘嘉賓出現。

黃心穎自爆係馬國明邀請佢嚟睇,知道佢鍾意睇話劇。兩人高調到場,難怪李霖恩都話呢兩位朋友俾足面。問到馬明同心穎有冇參演舞話劇經驗,二人不約而同表示讀書嗰陣曾參演過,期待將來再嘗試演話劇嘅滋味,問到佢哋介唔介意同台演出?馬國明笑言:「若酬勞OK,我梗OK!」心穎表示冇所謂:「我哋曾一齊拍劇,唔會抗拒一齊演出,因為最緊要有好對手,期待喺舞台劇上合作。」

此外,《我就嚟係歌手》呢齣歌舞劇唱盡香港八、九十年代經典金曲,首場演出有吳國敬神秘客串唱出《其實我深深愛着你》。吳國敬話緊張到失眠。

李霖恩之前曾透露為投資今次舞台劇「蝕入肉」,見觀眾激讚,喺謝幕時感觸一度哽咽,事後佢話:「演出前心情好緊張,但我唔係緊張自己,而係緊張一眾演員表現,擔心個騷一邊做,觀眾一邊走,但首場出來結果好順利,所有演員表現都超乎想像咁理想,完騷都冇觀眾離場,首場嘅成功,令自己好鼓舞!」

娛聞樂陪你走遍全球追星,即Like「娛果」FB 專頁!
BannerBanner