【「超人嗎?」】Eason刪上海Marvel相 「靠邊站」羅拔唐尼:Goodbye!

更新時間 (HKT): 2018.04.20 21:00

Marvel電影《復仇者聯盟:無限之戰》呢輪嚟到亞洲宣傳,去完韓國再去新加坡,噚日去到上海迪士尼,不過就發生咗一幕幕令人尷尬嘅事……包括主持人要求Ironman羅拔唐尼(Robert Downey Jr.)step aside(企埋一邊),之後陳奕迅(Eason)發揮吹神本色,除咗問Marvel英雄係咪超人(對台DC嘅角色),又講咗句Whatever(無所謂啦)。(新聞連結: https://bit.ly/2HfDjWW )

噚晚Eason為咗表達善意,有喺ig同微博貼出同羅拔唐尼嘅握手相,又話唔記得介紹「港版Iron Man」郭偉亮俾羅拔唐尼認識,結果一班MCU嘅fans就喺Eason啲相度洗版,話佢唔尊重Marvel同羅拔唐尼。結果Eason要刪走晒啲相。

其實今次大合照Eason企中間,都係大會安排,其實佢都幾無辜;只係佢嗰句「他們叫甚麼人?超人嗎?」、「超級英雄,Whatever.」即使是英式幽默,卻似乎帶來反效果。不少Eason嘅fans移陣地,喺Eason另一張舊相安慰佢,叫佢唔好介意啲惡毒留言。至於噚晚有份喺上海演出嘅Joey,就透過助手表示:「沒有回應。」

至於被要求step aside嘅羅拔唐尼,被指成晚「面色有啲黑黑地」,睇番佢ig貼嘅相,噚晚上海呢個「Marvel十周年慶典」,相中只係得導演羅素兄弟、蜘蛛俠Tom Holland、「洛基」Tom Hiddleston、「變形俠醫」Mark Ruffalo。至於同台嘅Eason、容祖兒,羅拔唐尼就冇貼出嚟。

有眼利網民仲發現,羅拔唐尼日前出席完新加坡宣傳,喺ig留言係用「Can’t wait to come back !」(期待再回來),而形容上海之行就係「Thank you and goodbye Shanghai. 」(感謝並告別上海),態度呼之欲出。

雖然話依家中美打緊貿易戰,但Marvel喺大陸嘅市場未受動搖,亦有不少大陸網民翻牆去羅拔唐尼ig道歉,話噚晚「喧賓奪主」事件太失禮,希望佢哋下次再去上海。

娛聞樂陪你走遍全球追星,即Like「娛果」FB 專頁!
BannerBanner