新出爐金像獎最佳男配角姜皓文（黑仔），得獎後只休息一日同一班大埔龍尾之友慶祝，又再繼續開工拍戲。黑仔最近同鄭中基（Ronald）合作拍攝新片《救贖》，日前出發去到泰國拍外景，到埗後即同導演胡耀輝見面開會，討論角色。
片中黑仔會同個可愛BB有對手戲，所以開拍前一直抱實BB培養感情，BB都好乖，眼仔碌碌望實黑仔唔怕陌生。收工後黑仔爭取時間，去逛夜市兼掃街醫肚，黑仔笑話：「泰國魚蛋米正呀！食完即刻返酒店瞓覺，第二日又再開工。」黑仔仲話喺夜市遇到啲香港遊客，佢哋都好熱情搵佢影合照，自己會繼續努力，報答觀眾嘅支持。
