【為慈善出力】呼籲大家搵佢拍嘢 陳玉蓮:我想拍喜劇

更新時間 (HKT): 2018.04.23 16:27
攝影:馬建華

陳玉蓮、關楚耀噚晚喺石硤尾出席為「香港復康力量」籌款舉行嘅慈善盆菜宴,陳玉蓮以香港復康力量活動大使身份現身,佢話:「呢個慈善機構每年會搞兩個大型籌款活動,一個喺維園,另一個係賣旗籌款,不過今年抽唔到賣旗,令到收到減少,所以就搞呢個活動去籌款。因為相對賣旗,搞盆菜宴嘅收入少好多,所以自己帶埋朋友嚟支持,身體力行,有活動就盡量返香港友持。」

陳玉蓮話o依家主要喺大陸幫小朋友,通常香港有慈善活動先返港支持:「因為呢個機構需要好多資金去營運,正如請復康人士,工作能力比一般人低,可能會請多咗人手,希望出席活動引起關注。」問到佢想唔想復出拍戲,陳玉蓮坦言:「冇人搵,我呼籲大家可以搵我,我想拍喜劇。」

另外,關楚耀笑言因為準備演唱會要操肌,所以嚟到現場都係有得睇冇得食:「近排不停操,體能可以應付,o依家最滿意係自己個body,但如果要去到最好狀態,當然仲要時間操,到時現場反應好嘅話,我都唔介意去騷肌。」佢仲話近排發覺自己變成前輩歌手:「唔係話後生仔唔識我,但已經有人叫我關楚耀叔叔,自己喺心態上都要接受。」

娛聞樂陪你走遍全球追星,即Like「娛果」FB 專頁!
BannerBanner