【《掃毒》後再合作】同張家輝埋位就打 劉青雲期待與靚靚演對手戲

更新時間 (HKT): 2018.04.24 14:12
劉青雲再同張家輝、袁詠儀合作新戲《煙幕》。

繼《竊聽風雲》系列之後,麥兆輝、莊文強呢對黃金組合,再次合作炮製《廉政風雲》系列電影,三部曲分別為《煙幕》、《黑幕》同《內幕》,頭炮《煙幕》由劉青雲、張家輝、林嘉欣主演,其他演員仲有方中信、陳家樂、湯怡同特別客串演出嘅袁詠儀等,老闆楊受成日前到拍攝現場探班時,家輝趁機會為劇組謀福利,結果成功爭取到5位數字萬歲請食好嘢,帶挈團隊有口福。

青雲同家輝繼《掃毒》之後再次合作,佢哋第一日開工就要埋身打,家輝笑話:「好榮幸,我哋一埋位就要打,不過係打枱波。」青雲同家輝有場桌球室對話戲份,唔使埋位時,佢哋就一齊打吓秮波,相當輕鬆,青雲仲話自己平時都有打開枱波。

戲中青雲同家輝會周旋林嘉欣之間,家輝話戲中嘉欣係青雲太太:「嘉欣曾經演過我童年時期嘅媽媽,呢次佢只係追捕我,所以我哋係追捕上周旋多啲。」遲啲輝同嘉欣會到外地拍攝雪地戲份,青雲就笑住投訴:「家輝同我戲中老婆林嘉欣嘅戲份仲多過我。」

除了嘉欣之外,青雲仲有位觀眾期待佢哋再合作嘅對手袁詠儀,青雲話:「靚靚係我合作得最多嘅女演員,真係好耐冇合作,開拍之前試過喺街遇到佢哋一家人,之後先知原來會合作。」

而湯怡就笑話同家樂等咗好耐好想做情侶,可惜仲係等唔到:「呢次我哋做唔到情侶,但我自己加咗啲曖昧眼神,唔知導演有無留意到,哈哈!」

娛聞樂陪你走遍全球追星,即Like「娛果」FB 專頁!
BannerBanner