【屋企4條Queen】老公前世好多情人 楊張新悅宣佈封肚:呢胎都係女

更新時間 (HKT): 2018.04.27 18:39

楊張新悅今日又一城,出席時裝品牌Rosamund MOISELLE活動,就講到自己呢胎已有7個月大:「暫時唔搭得飛機,會留喺香港安胎,今次陀BB唔辛苦,其實係習慣咗,都已經唔係第一胎,加上啲女大個,所以還好,陀咗唔辛苦,仲可以着高踭鞋,因為平時keep住做瑜伽。」問到BB性別,佢就終於揭曉呢胎都係生女:「之前有兩個徵兆已令我知道,第一先兆身體啲體毛開始甩晒,因為女仔手腳都有少少體毛,呢個之前發生過,其次之前有人幫我老公睇相,佢前世好多情人,所以加埋上次照埋,今次BB都係女,屋企第時有4條Queen。」

問到呢胎又係女,會唔會失望,佢就表示冇失望:「呢啲係上天賜,開頭自己諗過仔會唔會好啲?諗真啲,女係好嘅,因為如果囝囝嘅話,屋企咁多家姐,第時會變得好女仔,o依家係囡囡,屋企啲衫同佢哋睇過嘅書唔使買過,自己都講到明封肚,唔想再生,其實今次係一個意外,係上天賜畀我哋,其實帶住3個,仲坐到的士,o依家4個坐唔到啦,唔好再要。」

娛聞樂陪你走遍全球追星,即Like「娛果」FB 專頁!
BannerBanner