【狗仔出更】Marvel狂熱! 梁洛施帶孖仔睇《復仇者》

更新時間 (HKT): 2018.04.28 20:30

梁洛施(Isabella)為「小小超」李澤楷誕下9歲大仔長治同一對7歲孖仔H&N,今日傍晚Isabella,帶住一對孖仔現身圓方戲院,原來係入場睇《復仇者聯盟3:無限之戰》。素顏嘅嘅Isabella,着得好Casual,孭住背囊,戴住口罩,喺戲院大堂排隊買零食,買完零食即準備排隊入場。

如果小朋友食住薯片睇《復仇者》,唔知會唔會發生袁偉豪嘅「粟米片事件」呢?三母子排隊等入戲院時,見Isabella拎住爆谷,一對孖仔,一個拎住可樂同雪糕,另一個就拎住可樂同薯片,當然係一邊睇戲一邊嘆零食啦!

排緊隊入場時,Isabella發現有記者影相,即友善揮手打招呼,同埋回望望實兩個仔,仲用身體遮住囝囝 ,似乎唔想佢哋出鏡,不過孖仔全程笑笑口。記者問Isabella係咪入場睇《復仇者》,佢即點頭,細細聲話係,跟住就急急腳入場睇戲。

約於晚上7點50分,Isabella拖住孖仔離開,Isabella向記者表示:「好好睇呀。」問到囝囝喜歡邊個Marvel角色,笑笑口離開。Isabella 沿途緊拖兩子行到停車場,已有一部七人車等待,三人直上七人車就離開。

娛聞樂陪你走遍全球追星,即Like「娛果」FB 專頁!
BannerBanner