【別有風「味」?】五月天迪士尼騷周五開 入場前先要攻破廁所陣

更新時間 (HKT): 2018.05.01 17:18

台灣天團五月天由2006年起,幾乎每年5月都會喺紅館舉行演唱會,與港迷履行「五月之約」,今次五月天更移師陣地,將舞台由紅館搬到迪士尼。

五月天「人生無限公司」演唱會香港站,喺今個月4至6日、11至13日總共開6場,距離開騷日子仲有3日,場地已經差唔多搞好。記者今日入到去開騷場地——香港迪士尼幻想道露天場地,即旅遊巴士停車場嗰個位,場地可容納約兩萬觀眾。

現場所見,場地佈置大致完成咗八成,但仲有啲地方見到有泥濘,目測工作人員大約有7、80人,3面台前面嘅坐椅疊到好整齊,全新未拆封。演出舞台兩側有兩條樓梯可以行去觀眾席,可能到時可能係同「五迷」互動握手用。

話晒有兩萬名觀眾入場,仲有啲工作人員,廁所梗係唔少得,現場見到場地外圍有勁多流動廁所圍住,實情就好似用廁所當圍牆用,不過廁所同廁所之間實在有太多罅位,如果到時唔加封外牆嘅話,基本上可以喺外圍裝入去睇騷。

至於喺港鐵迪士尼站,就仲未貼出指示牌,提示觀眾點樣由迪士尼站行去會場。今日假期,迪士尼都人頭湧湧,好多遊客經過都有用手機影相。

話時話,呢幾日天氣都幾熱吓,加上嗰日啲觀眾應該會腎上腺素飆升,出埋汗,加埋被啲流動廁所圍住……睇五月天呢個騷,Oops!真係別有風「味」。By the way,溫馨提示,開騷時間提早至晚上7時15分。

娛聞樂陪你走遍全球追星,即Like「娛果」FB 專頁!
BannerBanner