【曾助養3個兒童】黃翠如初見養子女 叮嚀6歲囡囡勿早拍拖

更新時間 (HKT): 2018.05.01 16:17

黃翠如今日喺銅鑼灣出席宣明會「助養·童享快樂旅程記者會」,曾助養3個兒童嘅佢大談做助養媽媽嘅感受,翠如透露早前3月到孟加拉探望6歲嘅養女芭依同11歲嘅養子拜諾,佢笑指感覺好似相睇,仲話向芭依訓話,由於當地童婚問題嚴重,所以佢叮嚀芭依唔准早拍拖同早結婚。

受訪時,翠如指第一個養女已經18歲,能夠自立,所以現時只助養芭依同拜諾,講到湊夠一個「好」字,翠如表示申請助養後,由宣明會安排,佢話第一次見養女同養子,感覺好得意,因為之前一直都係寫信,佢仲指今次帶備文具、食物、水壺、袋等物資過去,總之帶得幾多得幾多,不過要離開嘅時候就會好難過。

男友蕭正楠(Edwin)有冇助養?翠如話:「我幫佢填咗表,叫佢返嚟簽名,佢知道當地小朋友面對嘅問題,佢都買咗好多布袋仔、好多水壺,我都好想同佢一齊去做探訪,但首先佢要做咗助養生先,今次係一個好好嘅生命體驗。」

大會指翠如有潛質做媽媽,佢笑住話:「首先要同助養嘅小朋友好好相處下先,都幾特別,都有少少做媽媽嘅感覺,原來有好多嘢係好擔憂,諗緊佢o依家點呀,食得夠唔夠,讀書點呀,將來大個會點,好多擔憂,亦係一個好大嘅福氣。」有心理準備做媽媽?翠如即刻話:「兩回事,未到呢個階段,我唔會跳step,我估我先結婚後生BB,Edwin比我更傳統,佢唔係呢個年代嘅人。」同Edwin有冇為將來做個時間表?佢表示:「問番佢,唔再講呢個問題,將來有機會就有機會,呢個問題好悶。」

娛聞樂陪你走遍全球追星,即Like「娛果」FB 專頁!
BannerBanner