【湊女不忘公事】A Music交新官打骰 黎明起用林建岳愛將

更新時間 (HKT): 2018.05.03 00:30

黎明由傳出同唱片公司A Music女助手Wing撻着,由認愛同最近榮升人父,一直成為傳媒焦點,連帶由其掌舵、同林建岳合作成立嘅A Music行政總裁王凱文離職,由邊個接手職務都有好多猜測。

據《蘋果》收到消息,林建岳其實早於月前已欽點身邊重將許冰心(Lisa),兼任相關職務,而Lisa首要任務便是為現年19歲嘅JC(陳詠桐)舖排未來發展,事關JC憑着前年作品《說散就散》喺大陸爆紅,今年年頭仲被邀現身春節晚會。

前年正式出道嘅JC,天生擁有一把同年齡不相乎嘅成熟唱腔,惟出道被嘲其一字眉似卡通人物「蠟筆小新」,難得年紀輕輕嘅佢,仲豁達喺網上發文,指如果佢嘅樣令大家唔舒服,佢唯有講聲抱歉,又話自己只係想唱歌,最後仲貼咗4款眉型,叫網民幫佢揀一款。

至於,其主唱嘅《說散就散》在這兩年間由香港傳到大陸、台灣,甚至最近去到馬來西亞,全因歌曲被大陸一部受歡迎嘅愛情電影《前任3:再見前任》攞嚟做主題曲,雖然電影版本由大陸女歌手袁婭維主唱,但樂迷對這位年僅19歲嘅原唱者更有興趣,歌曲至今Youtube點擊率已衝破4千萬,各地歌手、素人翻唱嘅版本則多達數百個,十分驚人。

娛聞樂陪你走遍全球追星,即Like「娛果」FB 專頁!
BannerBanner