【六嬸撕通告禁開戲】楚原講埋後續︰我出去向工作人員道歉,開車走人

更新時間 (HKT): 2018.05.05 16:15

84歲著名導演楚原,係今屆香港電影金像獎獲頒「終身成就獎」,當晚佢喺台上發表嘅一番感言,字字鏗鏘,盡顯智慧老人,其金句更喺網上洗版。

當晚楚原嘅感言入面,其中一個焦點,就係佢提及當年要幫邵氏開拍《天龍八部》,係開鏡前被方逸華撕咗通告唔俾拍,一開口就話佢︰「蝕錢你有錢賠咩!」仲話佢根本唔識電影藝術,唔識拍電影。此事傳遍影圈,楚原被指係邵氏公司「最難堪嘅導演」。

提起呢段人生挫折,楚原接受港台車淑梅《舊日的足跡》訪問中,再次重提往事。他憶述當年自己嘅電影唔賣座,希望拍金庸嘅《天龍八部》為邵氏賺啲錢,點知演員、布景、燈光都準備好晒,開鏡當日被方逸華撕下通告唔俾拍。楚原感謂︰「方小姐係一個好堅決嘅人,好少收回言論同決定。我出去向工作人員道歉,就開車走人,大家都好失望。我等到滿約就離開。」

拍過不少賣座電影嘅楚原,被方小姐批評不懂電影,咁楚原當時點解唔反駁呢?他稱︰「我同佢從來冇嘈過,只有佢鬧我,我冇反駁過一句。後來喺TVB見番,我好恭敬咁叫佢一聲方小姐。」楚原話自己係講事實,冇加鹽加醋或詆毀任何人,佢仲話即使方小姐仍在世,佢亦會講出呢段過去。

入行60多年嘅楚原,執導作品無數,其中1973嘅喜劇片《七十二家房客》,刷新咗香港票房紀錄,成為當年票房冠軍,更令粵語電影再次復興。當年楚原還執導過不少父親張活游演出嘅電影,佢最深刻嘅回憶,就係用導演身份叫︰「張活游埋位!」

娛聞樂陪你走遍全球追星,即Like「娛果」FB 專頁!
BannerBanner