【自嘲「奚肥蘭」】七十年代高妹奚秀蘭 16歲報藝訓班不獲簽約

更新時間 (HKT): 2018.05.06 00:01

高人一等梗係好啲,所以八、九十年代,娛圈突然興「長腿姐姐」,隨口一數就有「高妹」梁詠琪、「索腿天后」陳敏之、「九頭身」吳佩慈、「長腿」萬綺雯、「長腳蟹」呂慧儀等。呢班「高妹」算係生得逢時,如果早出世20年,佢哋機會可能逆轉......

68歲「小調歌后」奚秀蘭,當年16歲嘅奚秀蘭報名參加麗的電視(「亞洲電視」前身)舉辦嘅藝員訓練班,但最後冇獲簽約,原來因為生得高累事,當年女藝人生得高唔係好事,好難配小生。

塞翁失馬,焉知非福,奚秀蘭17歲參加香港業餘歌手唱歌比賽,以一曲《綠島小夜曲》成為得國語組冠軍,奚秀蘭一舉成名,佢又去咗無綫參演綜藝節目《歡樂今宵》(EYT),半鹹淡東話更成為觀眾開心果,歌影視三棲。

想當年奚秀蘭天生麗質,再加上有把靚聲,可是5呎6吋半身高,差點埋沒咗佢演藝發展,奚秀蘭日前接受《蘋果》專訪時話當年:「當時電視台,特別老闆唔鍾意人哋高,因為佢哋矮,佢哋認為『高妹』好難搵到拍檔,嗰時藝人好矮。但做人唔可以自卑,我自我安慰,我覺得上台唱歌,夠高係會鶴立雞群,舞台上殺食啲,氣場唔同,人矮拍電視劇OK。」奚秀蘭上台仲堅持加高,每晚都着三、四吋嘅高跟鞋,佢紅極一時,新年一日登台走十場,「唱到牙骹都痛,我仲同啲老闆講唔想唱,但又心軟,新年想帶歡樂畀觀眾。」 

人所公認EYT係木人巷,入親去個個都要扮鬼扮馬,奚秀蘭一晚分飾唔同角色,佢唔正廣東話經常語出驚人,笑料百出,「有晚我扮奶奶,杜平同肥肥(沈殿霞)扮我仔同新抱,我同佢哋講你哋都『成家立室』,口快快講咗『成家垃圾』,杜平爆肚:『我哋唔係垃圾嚟呀,媽咪』。」

62年嚟香港,4年後加入娛圈,奚秀蘭自爆一直想努力學好廣東話,及至三十年後才知道學不了流利廣東話真相:「當年導演吩咐所有電視台人唔准教我廣東話,否則嗰晚就冇笑話,唔怪得大家冇糾正,只係叫我大聲啲、咬實啲。」

「我嘅廣東話真係五十年不變,講講吓又唔清。香港人聽慣我呢啲廣東話,有時我搭的士,司機唔見樣,一聽就知我係奚秀蘭。哈哈,你哋都有今日,要講普通話,但你哋普通話仲爛過我啲廣東話喎,你哋仲搞笑過我。」

奚秀蘭除咗唔正廣東話五十年不變,其實佢身形變化都唔大,佢分享保養心得:「以前我最瘦時104磅,波叔(梁醒波)叫我『竹篙精』,我依家要改名叫『奚肥蘭』,依家幾多磅唔好講咯。」

奚秀蘭話堅持每周運動強身健體,除拉筋、跳舞做瑜伽,仲會甚打高爾夫球,「人唔做運動會退步。」佢又自爆早前跟十多名友人到甲龍行山,可惜同行竟冇人熟悉路徑,結果發生迷路事件,要報警求助:「3點出發行到9點幾,最終12點先返到屋企,同行有啲太太好驚,差啲想喊,天太黑,路又斜,我哋逼於無奈報警求助,好彩冇報道出嚟,唔係就好瘀,呢個故事教訓我哋真係行山前要了解路程。」

娛聞樂陪你走遍全球追星,即Like「娛果」FB 專頁!
BannerBanner